Tayongzükba aliba mapang ka nung Rahul-i khuret agizük: Sonia

New Delhi, Metsüremi (March) 17, 2018: Küptoknü New Delhi nung Congress Plenary senden nung Congress Party Tir, Rahul Gandhi, UPA Chairperson, Sonia Gandhi, taoba Ato kilonser, Manmohan Singh aser party lenirtem adenba noksa nung angur. 

New Delhi, Metsüremi 17 (Agencies): Congress Party lenir aser UPA Chairman, Sonia Gandhi-i, Rahul Gandhi-i tayongzükba tulu aliba mapang ka nung Congress Party Tir menden agizük, ta ashi.
Anogo asemnü Congress Plenary senden nung jembidang Sonia-i, “Tayongzükba tulu aliba mapang ka nung Rahul Gandhi-i iba khuret (Party Tir) agizükba atema ni pa nem tenüngsang agutsür. Iba ya otsü tasen ka tenzüker. Tir Rahul Gandhi leniba kübok India nung ochimashi malitsü atema asenoki inyaktsüla, iba atemaji asenoki tenangzükba agidi,” ta ashi.
Taoba mapangtem bilemteta lai, la party nung ajemokba mapang nung party jenjang mejungi akumba mapang ka liasü, ta ashi.
“Ni yimtenren nung ajemoktsüsa akumba tensa nenok ajaki meteta lir, saka kodang ni party jenjang mejungi kümdar ta metet, ni yimtenren nung ajemok,” ta lai ashi.
“Küm 40 tejaklen Indira (Gandhi)-i Chikmagalur nung takok tulu anguba sülen India yimtenren nung temelenshi adok. Yamaji asenoki asentenshir inyaktsüla. Party-i takok ngura ibaji linük takok asutsü, ibaji asenok ajak atema takok asutsü. Congress ya yimtenren olong ka masü saka mapatong ka lir,” ta lai party züngsemtem dang ashi.
Ato kilonser, Narendra Modi-i aniba sorkar aija lai, Centre sorkari taoba mapang United Progressive Alliance (UPA) sorkari inyakba mapatongtem tashimeiti kümdaktsür, ta ashi.
“Manmohan Singh leniba sorkar kübok rongsenkettsüng shilem timtiba ain. Tanübo Modi sorkari UPA mapang benokba schemes aser program tem tashi mait kümdaktsür aser sendoker,” ta Sonia-i ashi.
Laisa, “Tesüiba küm pezü tsüngda sorkari Congress samatsütsü atema inyakogo,” ta ashi. Plenary senden nungsa Congress-i 2019 küm Lok Sabha election nung BJP-RSS tamakok ngudaktsütsü atema tanga party tem den külemi inyaka asalentong yanglutsü atema jembia liasü. Ibaji ajanga election jakdang Congress-i tanga party tem den lokteptsü temaitsü sayur.