Tazüngla nungbo pusema menungittsü, saka Naga nunger atema tajung süra yaritsü : Sonia Gandhi

Nagaland nungi Parliamentary Working Committee-i Hokolbarnep New Delhi nung INC Tir, Sonia Gandhi den ajurutepdang agiba noksa angur.

Dimapur, February 19 (TYO) : Nagaland Legislative Assembly nung Naga yimten tebilemtsü atema tentetba Parliamentary Working Committee-i Hokolbarnep New Delhi nung Opposition Congress lennir aser INC President, Sonia Gandhi den ajurutepogo.
Naga peace accord nung Naga nunger, Northeast nübortem aser linüki aginüba ama onüktem benoka lira lar party-ia iba tenangzüktep pusema nungittsü ta Sonia Gandhi-i senden nung metetdaktsü.
Onoki Naga peace accord nung kechi lir-ar metet aser onoki tangtangbo cheque tazüngla ka pusema menungittsü, saka sorkari iba nung aliba onüktem Parliament nung benokba sülen ang Naga nungertemi, Northeast aser linüki aginüba ama süra ozü teloki pusema nungittsü, ta Sonia-i PWC züngsemtem dang ashi.
Centre sorkari iba tenangzüktep nung aliba onüktem linük nem memetetdaktsüi miimbanga dang yua lir saka Nagaland aser northeast nung yimjung aser yimten tebilemtsü atema telemtetba tajung agitsü atema inyakba mapa nung Congress dena lir, ta laisa metetdaktsü.
Tanep Congress Tir Sonia den lar kidang ajurutepa senden amenba nung Lok Sabha MP Neiphiu Rio dena liasü.
Iba senden nung PWC züngsemtemi Congress Tir dang yaküm Nagaland nung yimtenren telok balala nungi lennirtemi JLF tentetba osang metetdaktsü.
Naga yimten tebilemtsü asoshi telemtetba ka agitsü nükjidong nung aser Nagaland nung nübortem ajak tenüng nung ola adoktsü nükjidong nung JLF tenzük, ta PWC züngsemtemi Sonia dang ashi.
Naga yimten tebilemtsü asoshi külemi longjemer inyaktsü mechi nung Nagaland nung Opposition maliba sorkar ka tentettsüsa aküm. Congress party nungi MLA tem NPF nung adenbaji tanga onük kecha atema masü saka Naga yimten tebilemtsü asoshi tekaratiba nung telemtetba ka agitsü nükjidong nung liasü, ta parnokisa ashi.
1992 nung Congress-i Centre nung sorkar abendang Naga yimten tebilemtsü atema mitkar tashi ajanga telemtetba mangutsü saka iba ya linük asoshi khuret ka lir aser yimtenren telemtetba ka nüngdaker ta agizük, ta PWC züngsemtemisa Sonia dang ashi.
PWC züngsemtem tanü Delhi toktsür Kolkata-i ogo aser idakji parnoki All India Trinamool Congress lennirtem den ajuruteptsü.