TB tashitak anema sorkari mozü densema mera tasen agir

New Delhi, March 21 (Agencies): Centre-i, tuberculosis den raratsü asoshi mozü tasen ka den mera tasen agidar aser iba atemaji senotsü peria amshitsü, ta metetdaktsü.
Revised National Tuberculosis Control Program (RNTCP) dak sentakba nung Union Health Minister, J P Nadda-i Drug Resistant TB atema TB tashitak anema raraba mozü tasen ‘Bedaquiline’ den  Cartridge Based Nucleic Acid Amplification Test (CBNAAT) machine 500 tenzüktsüogo.
Nadda-i, “Onoki sentong takang yanglua benoktsüsa akümer aser senotsü peria amshitsü, iba den külemi iba mapa den sendaktepa alir ajak den mapang tatsü-talang ajak apidanga inyaktsü,” ta ashi.
CBNAAT ya revolutionary rapid molecular test ka lir koba ajanga kasa mapang nung Mycobacterium tuberculosis aser rifampicin drug resistance naprong puteter.
Iba tetendangba ya automatic aser ghonda ana tsüngda tetendangba osang angur. Iba ya tetendangba oset tajung ka lir aser traning balaka magiaka tezülen aliba tesemtem aser yimtsüngtem nunga amshitettsü.
“2015 küm tashi nung linük nung CBNAAT sites 121 liasü aser itemji ajanga DR TB putettsü atema decentralized testing agüja liasü. Tang ano machine tali 500 agütsüba ajanga DR TB tekaraba nung tendangtettsü,” ta paisa metetdaktsü.
March 24 nü World Tuberculosis Day amungtsü jilia “Unite to End TB: Fast Tracking access to quality diagnosis and treatment” sentong ya Health Ministry aser WHO nati senteper ayongzüka agiogo.
“TB anema raraba ya tanen makai inyakba ka lir aser onoki mapang talangka nungi iba tashitak anema rarar. Revised National Tuberculosis Control Program (RNTCP) ya 1997 küm tenzük aser iba mapang nung takok aser tamakok ajangshia aruogo,” ta Nadda-isa ashi.