TCP gate, Kohima nung sen rakzükraktemer ka apu

Kohima, Monupii/May 02 (TYO): Rongchii/April 30, 2018 nikongdang 6:00 ako meta TCP gate area, Kohima nung nisung tamajunger kari Manipur leni aoba truck garitem nungi sen rakzükraktemdar, ta osang angashiba sülen police Mobile Unit kati ibaji mita ao, ta tanü Addl. Superintendent of Police & PRO Kohima, Nagaland, Watichuchang Jamir-i sangdong ka nung metetdaktsü.
Mezüng asüngdangyaba mapang truck anirtemi ashiba agi, mejangjaba nisung ana registration No. NL01H-4496 Maruti Alto gari ka nung arur truck ana nungi sen meyirjang pezüzü khangzüker ao.
Iba sülen aonung 10:00 ako meta Mobile Unit kati, nisung kati Phoolbari nung anena ayuba gari abeni arudang paji apu; iba nisungbaji Tsiemekuma yim nungi asür, Golhoulie Rio’er jabaso arishi küm 32, Vilhouzhalie Rio @ Abao lir ta jangjaogo, ta sangdong nungsa shia lir.
Pa ket nungi .22 pistol ka den magazine, sen 4630, brown sugar südi ta melung melemi bilemba gram 3, aket mozü (cofmaxx), mobile phone (Lava) ka, cracker bomb ana, electoral card, ATM card aser gari indang jabi apu.
Iba dak sendakba nung Kohima South Police Station nung pa anema ken o ka benokogo, aser maneni bushisüngdangdar, ta sangdong nungsa shia lir.