TCS ajanga Andhra University ya Digital University-i melentsütsü

June 21, 2017 (Agencies): Tata Consultancy Services (TCS)-i yaria Andhra University School of Distance Education (AUSDE) ya digital university kümtsütsü.
TCS aser Andhra Pradesh nung aliba university tsüngda iba sentong asoshi tezüngzüktepba ka agiogo aser iba sentong tasenba ajanga iba university nung züngnürtem asoshi sabang tuluba lapoktsütsü, ta iba company ajanga Mongulbarnü sangdong.
Iba tezüngzüktep nung aliba ama AUSDE ajanga TCS iON sabang amshia kaketshir atema admission agiba, academic course content agütsüba, tatidang ketdangsüba aser tanga university nung ama ketdangsüba nung yaritsü.
AUSDE online ya online akümba sülen kaketshirtemi course balala shimba, fee agütsüba, tatidang agütsütsü asoshi hall ticket aser tatidang result tem online ajanga inyaktettsü, ta TCS ajanga ashi.
TCS iNO Platform ajanga university inyakyim ajunga digital kümdaktsütsü. Iba den külemi university indang kiojen, angazükba, tesayuba aser campus ajunga nung technology balala amshitsü.
AUSDE ajanga certificate, diploma, undergraduate, post-graduate aser professional course nung tang kaketshir 60,000 dak tali nem agütsür aser iba university ya digital akümba sülen shisatsü agütsüba nung jenjang tajungba kümdaktsütsü, ta AUSDE ajanga ashi.
“TCS iON Platform amshia AUSDE ya digital akümba sülen iba university nung sendaktepa aliba kija aser lokti ajunga maparen ajak tezübaba aser temolung lemteta jenjang temaba nung tamakok malui inyaktettsü, ta TCS iON Global Head, V. Ramaswamy-i ashi.
“TCS den tezüngzüktep agia Digital India sentong nung shilem ka akümba asoshi kanga pelar. Iba sentong tasenba ajanga ‘regular’ aser ‘distance’ education agütsüba inyakyim tuluba akümtsü nükjidong lir,” ta Andhra University indang Vice-Chancellor, G. Nageswara Rao-i ashi.