Team Europe-i Laver Cup kümnabuba kokogo

Rongjui/September 24, 2018 (Agencies): Amungnü Chicago nung Laver Cup asayamung anogo tasembuba nung Roger Federer aser Alexander Zverev nati pei tata asaya koka Team Europe-i 13-8 agi Team World kokogo.
Federer-i 6-7(5) 7-6(8) 10-7 agi America nunger John Isner koka Europe team takok asoshi point asem dang nüngdaka aküm koba Zverev-i 6-7(3) 7-5 10-7 agi Kevin Anderson koka ngutet.
Germany nunger asayar Zverev-i South Africa nunger asayar Anderson akoktsü asoshi kangajunga asayatsü nüngdaka liasü saka pai set tasembuba tie-break asaya nung tatembangbuba point pongu atonga koka Europe team nem takok agütsü. Iba asayamung ya taoba küm Prague nung mezüng asaya, koba Europe-i koka lir.
Asayamung tenzükba anogo nung Anderson aser America nunger Jack Sock na longjemer tarep asaya nung Federer aser Novak Djokovic na koka liasü aser iba sülen Küptoknü kija asaya nung Anderson-i Djokovic madak takok angu.
Amungnü tarep asaya nung Sock aser Isner nati 4-6 7-6(2) 11-9 agi Federer o Zverev na akokba sülen John McEnroe-i aniba Team World 8-7 agi tejakdang aküm.
Maneni Amungnü asaya nung World Team-i final asaya tonga asayatsü atema kija asaya mezüngbuba ana rongnung ka akoktsü nüngdaka liasü saka Federer o Alexander Zverev nati mezüngbuba asaya anaprongla akokba sülen Djokovic aser Australia nunger asayar Nick Kyrgios na asayatsü nüngdak melei aküm.
Bjorn Borg-i aniba takoker team nung Grigor Dimitrov, David Goffin aser Kyle Edmund nunger densema liasü.