Tebangmechi aser Marok tsüngda ajutok (Züngdangba 20: 1-12)

“Asenoki asen tetenzük tamang akangakanga tatem tonga ametra, asenok Khrista den lemsateper lir” (Ibri 3:14).
Tsüngremi Israel nunger pa nübur asütsü shimtet; Pai parnok tenüng teta aja aser metet; parnok temeshi alitsü asoshi pai parnok tangar nungi pilaa ayu; Pai parnok teka nung sot aser jajatsü parnok dang sayu; tebu ka ama Pai parnok tapu nung aben. Parnok pa senmangertem liasü. Parnok Ejip nung alar süa alidang Pa ola madoki mali asü. Sayatenya agi Pai parnok kümzük. Ajisüaka item nübur Kanani meyitet. Kechiba? Mamangbayong (Ibri 3:19). Parnok temenen aika alitsü akok, saka tongtibang aibelenji, mamangba liasü. “Tamang medeni Tsüngrem peladaktsütsü makok” (Ibri 11:6). Kotak yimlii aitsüba jenjangji Putu Lung” dak amangbaji lir. Mamangba agi molumi aor.
Mosa aser Aaron na Kanan lima jagi meyitet. Parnok temenenji kechi liasü? Mosa dang tetsüi tamang sayu. Tamang ajanga pa Ijip nunger temenen tepela magizük, anungji pai Tsüngremer nübur den timatem. Tsüngremia pa tamang tendang aser Pa tsüngdang tagizüktettsüsa liasü; aser Pa ama ainkar pa jakdang aser pa sülena mali asü.
Aaron a atamata nisung masü liasü. Pa Temaba putir asütsü Tsüngremi balaka aja. Tsüngremi pa nübur Ijip nung anitettsü asoshi Aaron aser Mosa tenaprong amshi. Saka timatemba mapang ka nungi tamang chiokadok. Lung nungi tzü adoktsü lung denji jembiang ta Tsüngremi ashiba o nung parnoki mamang. Tsüngremi ain adoka parnok dang ashi, “Israel Chir nükdang nenoki ni meshitetta ayutsü kü dang mamang nungji ni parnok nem agütsüba linüki nenoki iba telok anir marutsü” (Zung. 20:12). Mamangba ajanga Mosa Kanani meyitetbaji reprangang! Mosa dang tenangzükba limaji sayu, saka aitsü memela (Tazüng. 32:52). Marok aser tebangmechi tsüngda ajutok! Tsüngrem tenangzükbatem senmang amangtsü asoshi jenjang aika lir, saka tongtipangbaji tamang lir. Tsüngrem temoatsü angutsü asoshi asenoki amangdi.
O Tsüngrem, Ne tenangzükbatem kü meyong akümtsü kü tamang ulujang. Amen.