Tebilem dang bilem nung tashi angaba wheelchair ka yanglutetogo

New York, March 05 (Agencies) : Nisungi tebilem dang bilem nung tashi angaba robotic wheelchair ka US scientists temi yanglutetogo.
“Matamabensar karbo tenük ang süng kanga junga mamoshiteter. Anungji parnok atemabo tanga wkeelchair temji kanga nüngdak matoker,” ta Duke University nung neuroscientist Miguel Nicolelis-i ashi.
“Tekolak ret kija nung malokba oset ka ajanga temang shi meraksai wheelchair amshitetba onoki kanga jangja ngutetogo,” ta pai shisem.
Scientist temi temesüng oshi agi ‘Rhesus macaque’ ta ajaba shingo ka tekolok mapa inyakba ajak computer amshia asadanga liasü.
Iba mapang parnoki shingo tekolok tesem anasülen nungi neuron noklang aikati signal agütsüba ajanga parnoki metetba aser arakzüba putet.
Scientific Reports kaket nung online ajanga agütsüba nung shia aliba ama ibai asadangba mapang shingo jagi scientists temi yuja aliba tsükmenatsü auso atongtsü merangdangba tebilembaji computer jagi wheelchair den sentaktepa meyipzük.
Anungji shingo jagi wheelchair nung mener süngjang yuja aliba tesemi onüa bilemba ajanga oa atonger, ta Nicolelis-i ashi.
Neuron tem ajanga signal agütsübatem tali tajungba bushiloker iba inyakyim tajungba küma relokba sülen ang meimchir dak iba oset tendanga amshitsü, ta Nicolelis-i ashi.