Tebilemba jembitsübo menokdangtsüla

Tang ya Naga nunger yimten lemtet lenden nung nokdaka lir. Aji oda, Naga nunger jakdang lenmang aika alinungji, tanü Naga nungertemi koba lenmangi aotsü shimtetdir, tarutsü Naga nungertem jajatsüba lenmangji aji asütsü. Atangji, tarutsü tia shingaia meshitet, saka tarutsü anogotem asoshi bilemdanga telemtetba agitsübaji kanga tongtibang lir. Ibayongji, Naga yimten telemtetba agitsüba maparen nung Naga nunger ajaki shilem agia jembiner aser India den kechikomaka tashi jembia aoar, iba jenjangjia ajaki metetner. Atangji, India den jembidangbo nisung ka anatiang jembitsü aser Naga nunger ajaki bilembabo magizüktettsüa akok. Ajisüaka, senso ka ama tebilembabo shiner aser angadanger, anungji, asenoka ‘democracy’ yimten kübok alir asünungji, iba temetenjibo senso shia nema sademsadema amshitsü lenmang lapoktsütsüla. Iba ama yimten lemtet lenden nung nokdaka alidang, pei bilemba jembinertemji ACAUT telok ya ka lir. Iba tejangraba jagi parnoki yakanü Dimapur nung moapu nung lokti senden lia Naga yimten dak sendakba ken o nung pei bilemba lemsateptsü asoshi ayongzükogo. Ajisüaka, tejashitsüka Naga nunger lokti tentettem kari iba ama sendenji malitsüla aser nüngdak madoker ta tezüdangdakja inyakogo. Tetezü tang ama Naga yimten tebilemtsü tatembang küma India den telemtetba agitsü mapang anasai arur ama asüdang, Naga nunger tebilemba mejembitsüla ta bilemer asütsü. Ibajibo mashikoshi bilemba asütsü. Naga yimten lateterbo jembiyonga waro orr tempang akoshi ama mapang süir jembir asütsü, anungji jembiner atemabo tang ya jembitsüla. Aji oda, tang ya Naga nungertem kechi atalokdir aser kechikomaka telatetba ka bener arudir ta ajemajema atatsüba mapang masü saka Naga yimten tajungba ka latettsü asoshi Naga nungertem anogo shia tesem tesem nung adenshia shisalemsatepba mapang asütsüla. Atangji, lokti tulu mongdang amai adenshia yur yimten ken o süoka jembiba agi tajung ka madoktsüa akok. Aji oda, ACAUT teloki moapu nung nisung meyirijang aika adenshir shisalemsateptsü ayongzükba sentongjibo shisalemsateptsü asoshi masü saka kari jembiba o angai jaokba amato dang asütsü. Iba jagi telok kari iba ama alitsübaji magizük südi. Yimten telemtetba agiba maparen nung loktibo election ama, plebecite ama mesüra referendum ama agidang shilem agitsü saka shisalemsateptsübo teshimtet nübo den akatsüla aser itemjiang nübortem den osangtsüsang sangdongba yimya balala ajanga tangatetba agüja lemsateptsüla. Senso ka asoshi ‘democracy’ ajanga anguba temeten, maongka aser temoatsüji pei bilemba kecha matidaki jembitsü, zülutsü aser sangdongtsü akokba ya asütsü. Democracy malidakbo yimteni sensosanger nem pei jembinütsü jembitsü aser pei zülunütsü zülutsü memelar, anungji yimteni melaba tashika dang mesüra yimten dang asüngdanger külen dang jembir aser zülur. Tetezü, senso purtem rongnung shingaia yimten anema jembitsü memelar. Iba ama yimten yimsüsüba kübok alir nübortemji tepuokdak alir nüjiso manguba nübortemang mesüka lir. Iba ama yimten talenba kübok melinüba agi alima aika nung nübortemi yimten anema ola adoka apusoba angur. Asenok tia ajung, asenoki aginüba yimten jenjang metongtetaka, India ya demoracy agi yimsü asüba lima ka lir. Iba jagiang kecha marendaki asenok jembinütsü jembir aser zülur. Iba jagiang, jembiba dang masü saka anogo shia osangkakettem nung sensosangertemi pei yimteni meshitak, majung aser ochimashi inyakba osangtem zülua adoktsüba angutsü. Iba jagi yimten yimsüsürtem kümdangdaktsür. Yimten aser lokti ka ajungtsüba ya junger, junger ta asangba kijai masü saka majunga, meshitaka ta aija metongshitsüba agi ajunger aser ajak ajangzüker. Aji oda, Naga nunger ajaki junger ta agizüktettsüsa yimten telemtetba ka bushir süra Naga nunger asoshi kechi tajungba asütsü (?) ta bilemdanga shisalemsateptsü asoshibo menokdangi ajungshiteptsüla.