Tebilemba tajung

Naga yimten tebilemtsü tatem küma latettsü asoshi India sorkar o NSCN-IM telok na tsüngda tangatettep nung inyaka aotsü ken o renemba sülen, tang ano Naga nunger linük tenzüker telok pezüi, Indiai parnok den Naga yimten ken o jembitsü jaokra, parnok tsüngda shisalemsatepa India den jembitsü lemtetbaji tebilemba tajung nung lemtetogo ta angatetter. Naga nunger yimten tebilemtsü aliba agi Naga nunger ajak shisabolur aser ajaki tekaratiba nung telemtetba kati arudaktsüner. Joko, küm talangka Naga yimten nüjiso asoshi raraa arur asünungji Naga nunger ajaki Naga nunger yimten temeten indang angateta dang lir. Ajisüaka, tejashitsü kaji Naga nunger yimten nükjidongbo ka dang saka telok balala aika lemsar aliba agi timtem takoksabo aika ajurur saka tatem metongtet tanü tashi arur. Aji oda, tanübo linük tenzükertem dang masü saka nübortem dena kanga anibelemer aliba mapang ka asünungji nisung ajaki Naga lima nung yimjung aser telemtetba tajung ka aginer. Iba tangatetba nung NSCN-IM telokia India sorkar den memenui telemtetba katibo arutsüsa ken o jembir. Ajisüaka, Naga nunger linük tenzüker telok onsara nungji telok ka kijai India den jembiba jagi meperitsü aser telok ka den kija Indiai Naga yimten latettsü merangba jagi nübo, mapang aser rongsen talila aika endoktsüsa akümtsü. Naga yimten tebilemtsü tatem küma latettsü asoshi Naga nunger yimten aser lokti lenirtemi anir nübortem ajak tangatetba ka dang lir, ibaji kodangsüdir süaka Naga yimten jenjang tasen ka latetbajibo Naga nunger ajaki meraketa agizüktettsüsa ka asütsüla. Iba tangatetba aser terenembaji junger, ajisüaka Naga nunger ajaki meraketa junger ta agizüktettsüsa Naga yimten telemtetba ka bener arutsübaji Naga nunger linük tenzüker koba telok südir süaka, parnok asoshi tamakoktsü asütsü. Naga nunger asoshi ibai o entepba agi yimten ken o jembiba mapang masü saka pei tangatetba aser tebilemba yimjak nung süoktepa jembiba mapang lir. Aji oda, Naga nunger asoshi India nungi balaka razüka orr yimten nüjiso anguba kin ka ama alitsübaji tamakoktsü dang masü saka majung ta tangatetba nung Naga yimten latettsü bilema lira, ibajia nübortem nem timi angatetdaktsütsüla aser akok tashi Naga yimten telok ajak yangji kenbang obang medemtsü merangtsüla. Naga nunger linük tenzüker teloktem ka küma melongjemtetaka, tangatetba aser inyakyim nung longjemer kati ka den shisalemsatepa Naga yimten ken o India den jembia latettsü merangtsü lemtetba teloktemji Khole aser Kitovi nati aniba NSCN telok den NNC aser FGN telok par asem dena lir. Atangji, parnok telok asem pezükaji tangatetba kati aruaka, ano NSCN telok ana den NNC telok ana anünga alinungji, ajaki junger ta agizüktettsüsa India den Naga yimten telemtetba kati arutsübaji alima nung yimten mapa tasaktem rongnung ka asütsü. Item Naga yimten nüjiso asoshi inyaker telok ajakji kasasa tongtibang aser tanü telok ka danga mezüngshii toktsüra, iba jagi asüngbo telok tulu küma timtem agütsütsübaji ana nung lir. Iba tangatetba nung India sorkari Naga nunger telok ajak kasasa shilem agidakja Naga yimten ken o jembidaktsüra, yimten nüjiso jenjangsa masüyonga, ashiko, Naga nunger ajaki meraketa agizüktsüa akok. Atangji, India sorkari aji angateta lir. Iba jagiang Naga yimten telatetba kati arutsü jembiba maparen nung Naga nunger ajak den shisalemsateptsü India sorkar tenüng nung jembiri nangzüka lir. Ibaji lenjii aru amato, tang Naga nunger linük tenzüker telok pezüi parnok kati ka den angatettepa India sorkar den Naga yimten ken o jembitsü mulunga lir ta metetdaktsübaji langzüka, India sorkari parnokji ken o jembitsü jaokra, ibaji long kati ozü aika onzük amato asütsü. Naga yimten jenjang ya tang dang nungi tajungba latettsü nüngdakbaji Indiai angatetogo, anungji ibaji atema NSCN-IM telok denbo tejembidak lir, aser ano yakta tanüngba teloktemjia jaoka jembitsüla. Atangji, Naga yimten ken o India den jembitsü asoshi mapang balala nung tenzükaka, parnok ajak külemi shilem agia tembangra, ibajiang ajak atema tagizüktettsü aser tagitsü telemtetba ka asütsü.