Tebilemtsü ajakji terenlok dak keta lir: PM Narendra Modi

New Delhi/Varanasi, September 22 (Agencies): Ato kilonser, Narendra Modi-i, tebilemtsü ajakji terenlok mapatem dak keta lir, aser iba atemaji sorkari inyakdar, ta metetdaktsü.
Hokolbarnü Varanasi nung aliba Lalpur stadium nung lokti den jembidang Modi-i, “Linük sensotem nokdaktettsü atema onoki inyakdar,” ta ashi.
Paisa Uttar Pradesh kübok Varanasi nüburtem asoshi sen crore 1,000 jenjang scheme balala tenzükja liasü.
Terenlok project balala tenzüktsüba sentong nung jembidang Modi-i, “Onoki project temji tenzüktsüba dang masü, saka tembanga inyaktsür,” ta ashi.
Taoba mapang Congress-i aniba UPA sorkar aija Modi-i, parnoki project tem tenzüka yutsü saka tembanga meinyaktet, ta ashi.
Par sorkari sensakertem nem tashi agütsüner, ta shia Modi-i, “Onok nükjidongji terenlok mapatem atalokdaktsütsü atema lir aser sensakertem taküm jenjang melenshia parnok nem maongka agütsüner,” ta ashi.
Ato kilonser-isa “Sensakertemia parnok chirnur aser semchirtembo parnok ama sensak tia nung melidaktsüner. Sensaker shingaia pei chirnur nem sensak tia senmang magütsüner,” ta ashi. “Ozü sorkari sensak tia agientsü nükjidong lir,” ta paisa shisem.
“Lok Sabha election nung ni Baroda aser Varanasi menden naprong nungi toktep aser takok angu, saka ni Baroda menden toktsütsü lemtet, kechiyong yangji terenlok mapa inyaktettsüsa lenir aika lir. Ibayongji Varanasi nem kü mapang agütsütettsü atema ni iba menden shim,” ta pai ashi.
Modi-i Varanasi nung Deendayal Hastkala Sankul (trade facilitation centre for handicrafts & crafts museum) project tenzüktsüba den video link ka ajanga pai Mahamana Express train tenzüktsü. Iba train ajanga Varanasi o Gujarat nung aliba Surat na sendakateptsü.
Modi-isa Utkarsh Bank banking services tenzükja Bank amenoktsü atema lung azünga toktsü aser video link ka ajanga Jal Ambulance (water amublance) service aser ‘Jal Shav Vahan’ service (tasümang abentsü atema gari) tenzükja liasü.
2014 küm Lok Sabha election nung BJP-i takok tulu ngua pa Ato kilonser akumba sülen tang agi pai 11benbuba pa adokba menden, Varanasi semdanger, aser taküm March ita Uttar Pradesh nung BJP-i aniba sorkar tentetba sülenbo pai tang mezüng semdanger.