Tebilemtsü yakta tembangtsü

Naga yimten nüchiso otsü alimai meteta temai adoka jembir küm noklangkabuba nung tang India government tenüng nung Naga nungertem den jembir wabong Ravi-i Naga yimten tebilemtsü onük ya joko tatembang kati yakta arutsü ta metetdaktsübaji asenok asoshi tepelatsü osang ka lir. Atangji, iba osangji ashitsü aru amai tang pa Nagaland nung arua mongdagi. Atangji, pai jembir aser pai inyaker asünungji, pai ashiba o nungji tagitsü aser teimlatsü lir ta amangdi. Ajisüaka, tema nungi reprangertemi reprangtetba tebilemtsü kaji, tang tashi India government-i NSCN-IM telok den dang jembir aser Naga nungertem ajaki Naga yimten tebilemtsü latettsü atema telok ka den dang masü saka ajak den jembidaktsüner. Ibaji apibo Naga yimten tebilemtsü latettsüba ya ano mapang agitsü amai bilemer. Atangji, India government o NSCN-IM telok nati telatetba ka bener marutettsü ta masü saka parnokbo joko küm 20 buba jembir asünungji tejembitsübo ajak jembimar südi aser India government-ia mangatetbabo malitsü. Ajisüaka, Naga nungertemi shisabolua bilembaji, tanü Naga nunger tia majung, telok aika lemsar alinungji, telok ka kijai India government den telatetba ka bener aruba jagi teti asoshi Naga yimten tebilemtsü metembangtettsü. Iba jagi telatetbabo bener aru saka Naga nunger asoshibo tebilemtsü manen ta süra iba jagi ano küm aika timatemtsü. Aji oda, tangbo Naga yimten asoshi telatetba tasen ka bener arua yur Naga nungeri Naga nunger reshikangshitsüsa masü  aser Naga nungeri Naga nunger arishia khasettsüsa masü, saka Naga lima tasen küma yanglushiba nung ajaki shilem tajung agitettsüsa telatetba ka bener arutsüla. Aji oda, NSCN-IM telok den tejembidak nung India government tenüng nung jembiri Naga nunger lokti balala ajurua jembitsü atema Nagaland-i arupet aruba tetezüji India government-ia Naga nungertemi aginübajiang shitaka ta bilema alitsü südi. Iba ama mapang ka nung NSCN-IM teloki tensa tia meteta Naga nungertem tsüngdang ken o ka tsükdaktsütsüla lir ta bilemer. Aji oda, NSCN-IM teloki khen meyipa repranger, parnok kijai masü saka tanüngba Naga nunger linük tenzükertem ajak jaoka India government den külemi jembitsü sentong ka yanglutsüla. Atangji, tangar teloktem dang nungibo NSCN-IM telok tashi taitba, temetetba aser temaba asütsüa akok, ajisüaka ochi o kaji parnok kijai Naga yimten ken o latettettsü asübo latetter lila. Iba tangatetba nung tang India government-ia Naga yimten tebilemtsü ya tekaratiba nung latetnüa inyakdang, Naga nungertem shisa akatsüla. Shitakba agi, Naga yimten tebilemtsü latettsü mapang nenjunga arur süra tang yabo, Ravii Naga nungertem dang Naga yimten tebilemtsü ya yamai latetner, koda bilemer ta tezüluba kabo bener arua shisalemsateptsüla. Ajisüaka, yimten ken o jembiba nung kecha teinyaktetba aser terenlokba ka mali, Nagaland nung aruagi Naga nunger lokti tentettem densa ajurua jembiba jagibo kecha balaka yimten tebilemtsü akoktsüsa lenmang mengutettsü. Yimten tebilemtsü latettsüba ya nübortem mulung, anungji nübortemi kechi ashir ta asübaji kanga tongtibang asütsü. Tanü Naga nungertemi aginübaji Naga yimten telok ajak külemi oagi India government den jembir telatetba ka bener arudaktsüner. Atangji, Naga yimten tebilemtsü latettsüba yabo tasak asütsüa akok saka tang tangbo Naga yimten telok balala nungi lenirtem ajurutepa jembitsübo tasak masü. Tetezü, Naga yimten latettsü asoshi mapangbo tangsa tajungba lir. Item ajakji asadanga, NSCN-IM teloki anir Naga nunger linük tenzükertem telok ajak nungi lenirtem ajurutepa Naga yimten ken o latettsü asoshi jembitsüla. Iba telongjem senden ka lia, India government den Naga nunger linük tenzüker telok ajak külemi mener Naga yimten ken o süoka mejembi tashibo, Naga yimten tebilemtsü yakta latettsü ta ashiyonga mamangtsü.