Tebu asüko sentong nung adentsü atema Madras HC-i Nalini gondha 24 atema chiok

Chennai, March 8 (Agencies): Rajiv Gandhi tepsetba ken o nung aitsür taküm tepiyong atema tepuokdak puoka alila Nalini Sriharan nem khenü atema ‘parole’ temelaba Mongulbarnü agütsüogo. Madras High Court-i la ya 16 nü buba tebu asüko sentong nung adentsü atema anogo khenü atema chioker ano tanaben pua ayutsü tenangzüktepba yur chiok. La tebu ya taoba ita asü.
Nalini-i tebu asüko sentong nung adentsü asoshi anogo asemnü temelaba asüngdangba shidi ka Mongulbarnü zülua liasü.
Sür anogo 16 ajungba asüko sentong ya Kottur nung Bodhbarnü agitsü, ta lai züluba shidi nung shia liasü.
Iba temebishiba shidi ya Justice R Mala ket atong aser pai la nem anogo ka, Mongulbar nikongdang 4:00 ako nungi Bodhbar nikongdang 4:00 ako (gondha 24) tashi chioktsü temelaba agütsü.
La ya police-i meina aotsü aser tepuokdak tesemi Bodhbar nikongdang 4:00 ako nung tanaben anir arua puoka ayutsü, ta R Mala-i ashi.
March 2 nü-a Vellore nung Superintendent of Special Prison for Women dang lai asemnü asoshi chioktsü temelaba asüngdangogo ajisüaka iba ketdangseri kecha telangzüba magütsü, ta Nalini-i züluba shidi nungji shisema liasü.
February 24, 2016 nü la tebo Sankaranarayanan aremba sentong nung adentsü asoshi la gondha 12 atema chioka liasü, lai ta ashi.
Trial court ajanga January 28, 1998 nü Nalini ya alenseta südaktsütsü obendang agüja liasü. Ajisüaka Tamil Nadu Angh-i April 24, 2000 nü ibaji obendangji taküm piyong tepuokdak ayutsü küma melenshitsü.