Tebu ka tenangzükba

Tanü ya alima ajunga nung tebutem anogo lir. Iba anogo nung kibong shia nung kinüngtsüi anir jala-jabasotem ajaki tebutem nem tenüngsang agüja amonger. Atangji, tebu ka nem tenüngsang agütsütsü langa mapa jenti lir, anungji küm nung anogo ka agiteta tebutem nem tenüngsang agüja amongtsübaji tetemtsü. Ajisüaka, tebutem anogo ya kinüngtsü aser jala-jabasotemi koma mongtsür ta masü saka tebutemi tebutem anogo ya koma amonger ta asübajiang tongtibangba lir. Aji oda, tebutemia tebutem anogo indang ya koma bilemer ta asüba jagi dang tebutem anogoji jangjatsü. Kibong ka nung kinüngbo o kinüngtsü na khuret kasasa bena alitsüa akok, mesüra kibong kar nungbo tebubo kecha meinyaker saka tetsü inyakba agiang kibong mesüba kibongtema alitsüa akok. Koba amala kibong ka südir süang, kasasa rongnunga tebuji mezüng asütsü. Teburji kibong nung tekolak, anungji tenüngsang süli, maksü nung süli pa shilem tuluba lir. Atangji, kibong khuretji kinüngtsü den lemsateper, saka tebu ka mulungjang  nung tetsü aser tanurtem dang meshitetba shisabolu khuret jenti lir. Pai parnok shisamebuludaktsünüba agi, pai abenba khuret aser shisabolu ajakbo parnok dang mashir. Ashiko, iba jagi nisunger arishi nunga, kibong aika nung tetsü dang nungibo tebu arishi tatsüba alir südi ta bilemer. Atangji, alima nung nisunger arishi tatsü saka ano kibong ka arishibo nisung ka arishi dang nungi kanga agia tatsüba lir. Tanü asüng balaka, kibong nung tanurtem den külemi alitsü mapang mali. Parnok school-i aoba mapang nung khen kidang külemi alitsüba dak alaka, parnok ano kaketreju balala nung temaba shisaliok jenjang bushiloka aodangbo bendanglen alir aser tazüngba renemerbo joko kibong küma adoker, anungji kibong nung tsüraburi tebang agi sobaliba aser sayutsüngi o ashitsüba anogobo züngdangteta dang lir. Item anogo nungji tebu kati tebu ka ama kibong anepalutsü aser tanurtem dang sobaliba sayubentsü o tajung ashitsübaji kanga tongtibang lir. Aji oda, kibong kaji tangar tsüngdang tatishitsü tajung aketba kibong asütsü asü mesüra tansütsü kibong ka asütsüar, ibaji kibong nung tebu leniba dak akettsü. Tebu aikati tanurtem dang akhi tsürabur mapang nungi kanga timtema aruba otsü mashir. Tebu aikati taküm nung Tsüngremi kümzükba aser aochiba indang tanurtem nem memetetdaktsür.  Atangji, kibong aika tanübo takar kümer alitsüa akok, mesüra takar masüyonga akhidang timatemba amatobo timmedemi alitsüa akok.  Kibong aika nung Tsüngremi lendong timtem nungi kümzükba otsüa alitsüa akok. Ajisüaka, tanübo tebu aikati item timtemba aser shisabolu anogo to amar, akhidang nungi timmedemdang aru ama mezümeküma lia alitsüa akok. Ibayongji, pei kibong nung tanurtemi item Tsüngrem temeim aser temoatsüji memeteti asüküma Tsüngrema mali ama lia alitsüa akok. Tanü ama tebutem anogo amongdang, tebutemi bilemdangtsüba mapatemji itemji asütsü. Israel nunger Ijip lima nungi Kannan lima tongerbo, parnoki Ijip nung alar süa aliba tia to amadok, temerem tzüyim ana küma sadanger ajangba mebilemtet, anüngdang mepet aser aonung mi tongshi agi aniba sayatenya taochi indang parnok tebutemi parnok kibong nung mejembi. Mana aser ozü shi agi parnok mesüba anogotembo parnoki süsüsüsüa amadok. Iba ama mapang ka nung, Yihusui Israel nungertem nem tayongzükba tuluka agütsüba asenoki Yihusua 24:15 nung angutsü. Yihusua ya Mosa melen shimtetba Israel nung yimten lenir ka liasü. Ajisüaka, pai par kibong mamadok. Israel chirtem alar tia nungi anitetba Tsüngremji pai dang masü saka par kibong ajungai tenzüktsü ta pei nübortem madang ayimoktsüba tebuji Yihusua lir. Tanü tebutem anogo amonger süra, Yihusua ama tebutemia Tsüngremi pei taküm, kibong aser asen kin len ania aruba mamai züngshidi aser asenokbo asen taküm aser tanüla kümzükba Tsüngremsa tenzüktsü nangzükdi.