Tebu o jabaso na kibong akümtsü temeten bushir

November 05 (Agencies): Küm asem tejaklen court ajanga tebor ana tebu aser jabaso ta sangdongba sülen tang tena kibong akümtsü asoshi tetsükdaktsü adoker.

Taküm US nung aliba state 50 prong nung tetsür o tetsür aser tebor o tebor na kibong akümtsü temelaba magütsü tsüngda parnok ama nisungtem yagi külemi ki ka nung alitsü meji, tangar anioka par chir amai mesür (adopt) ta shia court ajanga kinungera ta temelabasa meshia liasü.

Tesayur mapa nungi anisüngzünger alir Nino Esposito aser taoba mapang technical tezülur aser pa den kazüsang Roland “Drew” Bosee nata küm 40 külemi aliba sülen, 2012 küm kati ka mesür ta court nungi tezüluba meshi, ta CNN-i metetdaktsü.

Tang US nung tetsür o tetsür aser tebor o tebor na kibong akümtsü temelaba agütsüba sülen tenata kibong kümer aser ibaji atema tebu aser jabaso tezülubaji maginer, ajisüaka state court ka ajanga tenati mepishiba magizük.

“Onoki taküm tepiyong nung—mesüra taküm 20ben tashi nung tebor o tebor na lidaktsütsü kenyongi mebilem,” ta arishi küm 68 tain, Bosee-i Pittsburgh Post-Gazette dang ashi.

“Kati ka mesür ta asüba ajanga küna külemi litet,” ta paisa ashi.

Tena pusemer Pennsylvania nung aliba American Civil Liberties Union (ACLU)-i, parnok ama nisungtemi kati ka mesür ta asübaji US sünga lir, ta ashi.

Common Pleas of Allegheny County nung Judge Lawrence J O’Toole-i, tenaji taochitsü ka lir, ajisüaka tena tezüluba nung tebu aser jabaso lir anungji kibong akümtsü temelaba magütsütsü, ta ashi.

Pennsylvania nung Democratic Senator, Bob Casey-i tena tebilemtsü nung nungitsü asoshi Justice Department dang shiogo.

Justice Department nung otongdar tetsür kati ashiba agi, department-i Casey-i züluba shidi kanga junga shisadanga asadangdar.