Tebui par jala küm 6 shi nung raksatsü

Mumbai, July 23 (agencies): Mumbai nung arishi küm 13 kaketshir tetsür kati lar tesayur dangi kanga dang asükijang merongtsü shidi ka zulüa liasü. Iba shidi nung tebui küm trok tashi la shi nung raksatsüba otsü den tetsüi iba mapa tamajung nokdangtsü atema kecha ola madoki ayuba otsü tejangja zülua lir.

Class tenet nung azünger jala kati lar tesayur nem shidi ka agütsüba ajanga iba otsü ya temai adoka metet. Iba shidi nung “Kübui ni shi nung küm trok tashi raksatsü saka ketsüi ni meyari,” ta zülua aliba, Mid-day osang kaket ka ajanga metetdaktsü.

Iba tesayur jagi kodang shidiji azüng la kanga adentena liasü.

Kodang tesayur jagi iba shidi ji teyari meshiba shidi ka, ta angateta aru Vansi nung aliba NGO ka dang teyari meshi.

Iba sülen NGO jagi tanutsüla tsürabur tem anema shi nung raksatsüba ken o ka benok.

“Kübui ketsü lia kü den shi nung medem. Iba sülen ketsüi kü nem mozü sa chidaktsü. Ni arishi küm tenet asü dang nungi pai kü den iba ama mapa tamajung inyaktsü tenzük. Ni ketsüi dang ashiyonga lai meyari,” ta tanutsüla jagi shidi nungji zülua liasü.

Iba tanutsüla tebu ya arishi küm 45 lir.

“Kodangsa küdi nunger kidang meli-lir ketsü lia kübui kü dak teti iba mapa tamajung inyaka liasü. Ni ketsü dang iba mapa tamajung anentsü aiben shiogo saka lai mangar,” ta lai police dang ashi.

Joko ni iba otsü ya kiyi, arishi küm 17 la danga shiogo, ta lai Vashi police danga shiogo. Police-i iba sülen bushisüngdangba mapang, jala tantsülaji tsürabur den malir aser la daka tebui kasa mapa tamajung inyak liasü, ta putetogo.

School nung counselling agütsüba sülen tanutsüla tasü itshi aser teyari meshitsü apuso, ta Vashi police station nung police ketdangser kati ashi.

Police-i asüngdangyaba mapang, tanutsüla tetsüi, tebui la dak mapa tamajung inyakbaji meteter hopta ana shi dang süir. Ni metetli yongi kinüngbo arrtsüogo, ta dang langzüa liasü.

Iba bushisüngdang tenzükba mapang nungi tanutsülaji NGO meyong ‘children’s home’ ka nung yua lir.

Tsürabur ana prongla anema IPC arrla 376 (rape) aser IPC arrla Section 5(L)(N) ‘Protection of Children from Sexual Offences’ (POCSO) Act, 2012 kübok ken o benokogo.

Tanutsüla tebujibo tang police-i pua yua lir.

Deputy Commissioner of Police Shahaji Umap ( Navi Mumbai Zone I)-i “Onoki tebu bo pua lir saka tetsü atema bushisüngdang südar. Tanutsüla jagi tetsüi mozü sa agütsü, ta shia lir anungji onoki ibaji kechi mozüsa agütsü’ar ibaji bushisüngdangtsü,” ta ashiba osang ajanga metetdaktsü.

Kodang item tatalokba osang tejangja bendenmadir, iba sülenji tettsü-a aputsü, ta ketdangsertemi ashi.

Tetsüi la nem chidaktsüba mozüji tanur mebenloktsü atema agütsü südi, ta iba ken o nung bushisüngdanger police temi mulung melemi bilemer.