Tebutedi Kibangwar alima nungi pilaogo

Dimapur, May 22 (TYO): Chuchuyimpang nunger wabong Kibangwar Jamir mapang tatsüka temang mejungi aruba sülen Dimapur nung par kidang lia May 21 anepdang iba lima nungi pialogo aser tanü May 22 nü pa den asüpila sentong agiba sülen Dimapur nung pa mang rema yutsüogo. Pa arishi küm 81 liasü.
Wb. Kibangwar ya government mapa nung sodia magii kanga nendaka inyakba nisung ka liasü. Pa dak pei lima aser nübortem meimba shisatsü liasü, anungji pai government mapa nung nendaka inyakba dang masü saka pa alidak pai lokti mapa nung kanga temulung agüja tenzükogo ta pa den asüpila sentep sentong nung jembirtemi kuli agütsü.
Pa ya Patkai Christian College nunga 2004 küm nungi Board of Trustee nung dena Treasurer mapa bena liasü. Iba mapang pa dak ajaki temulung lemteta kanga junga inyakogo ta PCC tenüng nung jembiri metetdaktsü.
Asür Wb. Kibangwar ya Naga nunger civil engineering azüngertem rongnung tamapur liasü. Pa mapa nungi anener külena anisüngzüka melii lanurtem asoshi kaket tongtibang ana, Naga Yimten Wadang aser Nagas with Three Nations kakettem zülua toktsüogo.