Tebutem School

Lanuwa nungi Tsüngrem temeim aser Khristar Osangtajung angazükba mezüng tamendakdakji  Deobar school lir. Deobar school nung Laishiba otsütem angazükbaji mamar aser taküm nung benshia aor. Iba den kasa alima kaketshisatsü angazükba reju, school nung kaketshisatsü jenti angazüker aser itemji ajanga asen taküm nung len anir. Tsüngrem temeim metetba den külemi alima shisaliok metetertemi alima nung taso shia lir ang ano Tsüngremer senmang-a ajangzükteter. School karbo nüngdak apir mapang balala nung tenzüka aoer, aser item rongnung Father’s School yaa ka asütsü. Tebutem School ya mezüng South Korea nung tenzük aser tangbo tanga linük aika nunga Tebutem School agiyonga aor. Tebutem School nung adenba ajanga tebutemi tajangzük aser temoatsü angur ta tangatetba nung asen lima nunga iba school tenzüka kanga junga odar. 2015 küm October ita nung New World Wealth-i alima nung takartiba linük 20 sangdongba tarensen nung South Korea ya 13buba nung (US sen billion 2269) densema lir. Par linük nung tebutem mapa nung kanga temerang aser parnoki ali rongsen jenti aazüker, ajisüaka tebutemi pei kinüngtsü aser chirnurtem nem mapang magütsütetba den kibong yangerba nung tashimait reprangteta 1995 küm South Korea yimtiba, Seoul nung aliba Duranno Bible College nung Tebutem School ya mezüng tenzüka liasü. Hopta ka jungnua agiba school nung tebutem dang temeim aketba tebu tajung ka akümtsü aser kibong yangerba nung shilem tajung agitsü tesayuba balala agütsür. ABAM kübok Kohima Ao Baptist Arogo (KABA) lenirtemi iba school indang mezüng  angazüka Ao lima nung Arogo aika nung iba school tesayuba agütsüogo. 2014 küm nungi Dimapur Ao Baptist Arogo (DABA) nunga iba school tenzük aser parnoki Dimapur aser temeket Arogotem nung achaayanga iba School katsür. Maneni Ao Arogotem ajak nungi iba school agiyonga aoba ajanga asen lima nung tetemjen tebu aika adoktsü imlar. Tanü putu alima tensa mejungi akümba den yimten aser Arogotem nunga tashimait akümer, aser yimten lokti tashi aittsü atema mezüng mongchenji kibong asütsü. Kibong junga yangertsüji tebuti ka dak tuluka keta lir, anungji tebu shiaji kibong khuret metetba tebu kaka akümtsüji tongtibang. South Korea nung tebutem ama asen lima nunga ‘kibong tepok mesütsü atema ali rongsen agütsüra teperi’ ta bilemba tebutem aika alitsü südi. Tebutem School ka nung tebu kati par jabaso den ball mesaiba atema pai kanga sasaba otsü lemsatepa liasü. Par jabasoi pa den külemi ball asayatsü mapang shia asüngdang ajisüaka pai pa kanga mazünger ta shia ball tasen dang alitsü. Par jabasoi pa nübo aginüa liasü, ajisüaka pai tanga ka dang agütsü. Aji oda asenoka aika yamaji alitsü südi. Tebutem School nung adenba sülen tebutem aikati sen medenaka o aser mapa balala ajanga mapa tajung aika inyaktet ta angazüka taküm nung ibaji mapa küma benshir. Tebutem School ji tanüdangtsü/aina ka mesük, kong tebutem aikati pei sasa pei tashimait bushiteta tebu tasen ka akümer. Bendang linük balala nung inyaker Korea nunger tebu aika Tebutem School nung adenba sülenbo pei kidangi oa chirnurtem aser kinüngtsü den tesentaktep yanglushitsü yongyaba otsü züngshir. Asenokbo kar dak alaka timbaka pei kibong den külemi alir, anungji anogo aben kinüngtsür aser chirnurtem den tesentaktep yanglua kibong yangertsüji jangratemtsüka aser Tsüngremer maongka ulura ta züngshitsüla.Tebutem School nung adentsüsa nü nema mapangi sempettsüra, iba maongkaji agidi.