Technical Education department tip atemtsü

Kohima, June 3 (TYO): Directorate of Technical Education ya miimmechi maliba department ka kümdaktsütsü ta Hombarnü Nagaland sorkari tenangzükba agiba osang metetdaktsü.
“Onok atema tongtipangtiba teinyaktsüji technical students yaritsüba lir aser onoki iba atema mapa inyakdar. Tang nungi technical kaketshirtem indang scholarship tebilemtsü madoktsü” ta Technical Education Minister Temjen Imna Along-i ashi.
“Comptroller Auditor General of India, Nagaland indang 2018 report nung scholarship tim mesüi amshiba ketdangsertem tenüng yimjak nung memetetdaktsüba atema All Nagaland College Students’ Union (ANCSU)-i Arjun Singh dang Director mapa nungi anentsü akhangba ya alia oa inyakba mapa ka lir aser iba atema sasar” ta Minister Along-isa ashi.
“ANCSU-i züluba shidi aser RTI agütsüba onoki akhümtsübur aser department-ia akokba tashi telangzüba agütsüogo” ta paisa shisem.
CAG indang report nung ajemdaker State Vigilance Commission-i iba onük bushisüngdangtsü agizük, saka taküm February ita Lokayukta tentetba ajanga parnoki iba onük bushisüngdanger, ta Along-i metetdaktsü.
Directorate of Technical Education-i scholarship sen crore 1.6 tim mesüi amshi aser iba mapa inyakertem yimjak nung metetdakjang ta ANCSU-i akhanger.
“Iba senji tanga scholarships atema masü saka technical students atema scholarship liasü. Tang Department nung teinyakdak ketdangsertem aser paisa iba sen tim mesüi tangalen amshibaji memetet liasü, kechiyong ibaji tesüiba küm ana tsüngda inyakba masü. CAG report ji 2014-2016 nung ajemdaker agütsüba liasü” ta Minister Along-i tanü ashi.
“Ni Delhi nung sorkar akümba maparen atema oa liasü aser onok elections atema taoba ita 2-3 tashi mazüngi liasü. Tanabuba nung iba onük ya 2014-16 nung atalokba liasü aser tasembuba nung Lokayukta-i bushisüngdang südar” ta paisa shisem.
ANCSU-i Lokayukta dang nungi tenüngtem meshitsü akok saka Lokayukta-i tatembang oshidang ka magütsü tashibo department ketdangsertemi kecha meshitettsü, ta paisa ashi.
Nagaland Voluntary Consumer Association-i non-indigenous Naga ka komaser Head of the Department aküm ta asüngdangba atema Minister Along-i “Arjun Singh-i tesayur ka ama Khelhoshe Polytechnic nung inyaktsü tenzük kechiyong iba mapang nüngdakba ama asen niusngtem tazüngertem maliasü. Anungji, promotions aser seniority nung ajemdaker Singh-i director jenjang atong” ta osang jangjashitsü.
Commissioner & Secretary Technical Education, Dinesh Kumar-ia ashiba agi, “ANCSU-i akhangba ama telangzüba agütsütsübaji Directorate ketdangsertem masü saka Lokayukta lir.”
Nagaland-i engineering college talila bener arutsü meranga, state nung polytechnic reju tejentiba Khelhoshe Polytechnic-i asüng National Board of Accreditation dang nungi Accreditation meshitsü, ta Minister Along-i ashi.
“Khelhoshe Polytechnic nem accreditation agütsüba sülen, Nagaland nung full-fledged engineering institute akümtsü imlar” ta paisa shisem.