Technical Education indang 4 buba Regional Workshop tembangogo

Rongchii (April) 9, 2018 nü Hotel Vivor Kohima nung Higher &Technical Education Minister Temjen Imna Along-i Technical Education indang Workshop nung adenba Director aser Principal tem den külemi agiba noksa ka angur.

Dimapur, Rongchii (April) 9 (TYO): North Eastern State tem atema Technical Education indang 4 buba Regional Workshop tanü Hotel Vivor Kohima nung tembanogo.
Iba Workshop tembangba sentong nung jembidang Higher &Technical Education Minister, Temjen Imna Along-i tarutsü nungbo state balala nungi Higher and Technical Education minister tem aser faculty students jaoktsüla ta ashi.
Iba Department ya linük yangerba department ka lir aser department-i north east nung polytechnics lapoktsü atema tesemtem bushitsüla. Talisa department-i northeast den apet programmes & courses agitsüla aser ibaji ajanga state aser linük ajangzüktsü, ta Imna Along-isa ashi.
Class 8 tashi azünger mesüra 10 tashi züngtor anenertem nem technical education agütsütsü atema lenmang bushiteptsüla, ta paisa shisem.
Higher &Technical Education Minister-isa sensaker kibongtem nungi kaketshirtem nem maongka agütsütsü aser polytechnic tesayurtemi talila awaloka oa kaketshirtem sayutettsü atema ayongzük.
Iba sentong nung Director NITTTR Kolkata Prof. Phalguni Gupta-i onük kar lemsatep.