Technology tasen ajanga arishi küm 72 ka tanaben jajatet

New Delhi, August 21 (Agencies): Arishi küm 72 tain tambur ka temulungjang nung azü belenba tezü kar nung azü mejai tangbangba ajanga mejajateti aliba technology tasen ‘Artery Clearance Therapy’ ajanga anepogo, ta Hokolbar nü doctortemi metetdaktsü.

Haryana nung alir, Ramprasad ya kechisarena inyakba mapang kanga timtema liasü aser kodang temang tentang, temulungjang nung azü jajaba tezü asem tashi noklang nung shilem 90 tangbanger aliba putet. Anungji pa temulungjang nung tezü tangbanger alibaji atema “bypass operation” agia liasü.

Operation agiba sülenbo pa temang nung anisüngzük angutsü ta pai kanga imla-a liasü, ajisüaka temulungjang nung tanaben kasa timtem adok.

“Operation agiba sülen ni doctor temi ashiba ajak angaka kü temulungjang nung tim atemba manener,” ta Ramprasad ashi. Iba mapa nung pai temulungjang yaritsü atema tanga theraphy lir ta memeteti liasü.

Doctor temi pa dang ano tanaben operation agitsü tetuyuba agütsü saka pai lendong kanga maliba yariyim kar ajanga khen yaridangnüa ashi.

Idangji pa dang Science & Art of Living (SAAOL) ‘Heart Care Centre’, Delhi nung Bimal Chhajer den ajuruteptsü ashi. Anungji pai iba tesem jagi ao aser yangji Artery Clearance Therapy (ACT) agi.

Iba therapy agiba mapang pa dang yangji aliba ‘rehabilitation centre’ nung alitsü asoshi ashi aser pa yangji lia iba teyari agiba mapang tanaben jajatet aser tanga mapa-a mela mela inyakteta aküm.

Chhajer-i, “Iba therapy agidang biochemical, anti-oxidants, vitamins, isotonic carrier aser PH balancing drug meyokteper shirangsangdakji ghonda ana ser tesadang tuoktsü,” ta ashi.

“Iba mozü ya ajanga tezü tangbanger alibaji anema aliba mapang ama anük anüka kümdaktsür. Iba temelenshi ya mozü trokben nungi terben tuoktsü tashi nung meteta akümer,” ta pai ashi.

Saka iba therapy ya teti dangbo takok ngua magiteter kechiba süra kar dakbo ano tashidakji meyipa arur, ta tawa tanü bushisüngdang tasen kar ajanga ngutetogo.