Teimla ka

Mokokchung nung Imkongliba Memorial District Hospital (IMDH) nung yakanü arishi küm 41 tebur tain ka teberem tsünglanglen operation takok ngua agitetba jagi nübortem nem teimla tasen tuluka agütsüogo. Nagaland nung government mozü ki majungba kisüng jembidang aser züluba mapang ka, Mokokchung nungbo government mozü kidang operation patekaji takok ngua agitetba jagi mozü ki ajakbo tamajung masü aser doctor-tema ajakbo pei agitsü arishir dangbo masü ta kuli tajung ka angur. Iba ama government mozü kitem dak teimla samar nübortem shisaboluba mapang IMDH nung doctortemi operation tulu takok ngua agutetba asoshi kanga pelar aser parnok nem tenüngsang tulu agütsür. Aji oda, ano Mokokchung nung government mozü kidang operation tulua takok ngua agitetter ta angashidang, operation-ji aseniang agi ama kanga nümadanga bilemer. Kin ka aküm ajungketbaji nisung kari iba amaji pei mapa nung pei tajangzük angutsü bilema masü saka nübortem tajangzük ngudaktsütsü bilema inyakba ajanga ajungketer. Atangji, asen lima nung government mozü kidang nübortem taneptsü mangutsüsa akümba ya doctor aser nurse-tem tai masü saka yimten nung yimsüsür aser ketdangsertemi nübortem ajangzüktsü bilema masü saka pei ajangzüktsü bilema inyakba ajanga lir. Mozü ki kanga junga yanglutsü melen, mozü ki yanglutsüba sen agi mozü ki meyanglu chiadokra kodaser mozü agi ajungtsü ? Aji oda, mozü kidang sensakertem dena angati taneptsü angutsüsa mozü angati talubo agütsütsü melen mozü alitsüba sen chiadokra, komaser nübortem yaritettsü ? Government mozü kidang blood pressure tendangba oset nungi tenzüka cancer tashidak agi shiranger anepaluba machine tashi shitak ayutsü melen, item machine-temji mekara kodaser shiranger anepalutettsü ? Doctor aser nursetem Kohima aser Dimapur nung dang alitsü meraktepi Nagaland tatembanglak tashi oagi temeim agi nübortem yaritsü tangatetba nung lidaktsütsüsa mozü ki jungjunga yanglutsür aser parnok alitsü ki dena jungjunga yanglutsütsü melen, mozü ki merüktsü atema mozü tzü alitsü dena magütsütetra, shibaibo oagi temulung süa nübortem tenzüka alitsü ? Aji oda, shiranger ayiptsü asünungji yipten tajung temerük den yipten süoshi tajung aser temerük yutsütsü melen yipten nungang tashidak menatsüsa song tur tejen ka madak sü tejen teshisa-ang kar yutsüra, yangji kodaser shiranger temulung anisüngzüka amongtsü ? Kiojen ajak dang nungi mozü kisa temerüktiba asütsüla, kechiyong ibaji tashidaktem den raradak aser taneptsü angudak tesem lir. Ajisüaka, tanü asenok nem yanglutsüba mozü kitem reprangdangra, kima asüdangyongi metsümeshidak nungi teshinem aser tezüknem adokba agi saktsüdi asür. Ano, shiranger alidak takdangtemi tonga odangra, temeimtsüka kecha taneptsü angudak amongerbo memesük monga aliba angutsü. Item timtemtemji ajangshidanger aser anguribo temulungjang nungi dena nüktzü yima bilemer. Iba ama nübortem timtem manguba yimsüsür aser ketdangsertem dakbo nisung mulunga maden ama jashia bilemer. Shitakba agi, kitem rongnung mozü kisa temerükba asütsüla aser mozü kidang shirangertem dang masü saka parnok den yaritepertema temulung süa chia ajemtsüsa chiyongdak tajung aser temerük alitsüla. Item ajakji yimten nung yimsüsür aser ketdangertemi pei ajung masai nübortem ajunga asaa inyak tenzük nung dang ataloktsü. Atangji, doctor aser nursetem daka nübortem meima yarinüba shisatsü alitsüla. Alima nung timtem tulutibaji pei meinyaknüba mapa ka inyaka aliba taküm asütsü. Aji oda, shirangertem sempaseta kodaser doctor aser nurse mapa inyaktsü ? Tanü Mokokchung mozü kidang operation tulu takok ngua agitetba amaji koba mozü kidang südirsüaka tashidak reprangtsü, putettsü aser anepalutettsüsa state goverment-i ano khen meranga government mozü kitem tajungba kümdaktsütsü asoshi pei tetsü tasoli aser nübortem meima inyaktsüla. Mozü kidang inyakertem balaka,ita sen atema masü saka temeim agi shiranger anepalutsü tangatetba aser temulungtetba nung inyaktsüla. Ibaji tepela aser tashi tasen angudak asütsü !