Teimla makaba tetsürtem asoshi lenmang ka lapok

Yangtepnü Indisen, Dimapur nung “Hope Channel for Distitute Women” tesem semzükba sentong agiba noksa ka yangi angur. (Dimapur Aug. 01, 2019)

Dimapur, August 01 (TYO) : Tanü Brehostibar nü Dimapur nung Indisen yimtak Ebenezer Welfare Society-i teimla maka timtema alir tetsürtem anepalutsü asoshi lapokba “Hope Channel for Distitute Women” ta ajaba tesem ka Dimapur Ao Baptist Arogo (DABA) nung sannüker, Rev. I.Wati-i sarasadema semzüktsüogo.
Iba sentong nung jembidang, Ebenezer Welfare Society nung tongti ketdangser Wt.Tiala Amri-i ashiba agi, 2005 küm tamasa parnoki tsürabur maliba tanurtem anepalutsü asoshi Ebenezar Orphanage Home lapok aser iba sülen tantsür tamburtem mulung pelaa lidaktsütsü asoshi 2014 küm Tribal Old Age Home aser Day Care lapok aser ano tang teimla maka timtema alir tetsürtem asoshi iba tesem ya lapoker. Laisa ashiba agi, tang tashi nung Ebenezer Orphanage Home nung lia school züngdaktsürtem parnok nisung ti-i class 10 ajangatetogo aser tang parnok den tanur 20 lir.
Ano, tantsür tamburtem asoshi lapokba Old Age Home nunga parnok anidena sensaksemdaktsür aser Tsüngrem o bushiba nung mapang endoker. Ano, iba kidang kaket azüngtsü asoshi kaket tapu balala yuja lir.
Tanü Brehostibar nü “Hope Channel for Distitute Women” tesem semzükba sentong nung jembidang, Tir Yimyim yimozülur, Wb.K.Temjen Jamiri tsürabur malir lajartem aser azüngmeyaka aliba tantsür tamburtem anepalua aruba den külemi ano teimla maka timtema aliba tetsürtem asoshi teyari angudak tesem ka lapoktsü bilemtetba ya temeim mapa tulu, ibaibo kotak tenyar mapa ta Wt.Tiala nem tenüngsang agüja metetdaktsü.
Tanü asen alidak meketa tetsürtem karbo kinungbo majungba agi baladokba, karbo rongsen tsütsü timtemba agi pei mang ayoktsüsa akümba aser karbo peisasa pei taküm mazüoktetba agi yi aser mozülar kümer teimla makaba tetsür aika lir, item nemji teimla agüja taküm tasen kümdaktsütsübajibo chichiba temulungjang nung temeim aketba purtemiang inyaktettsü, item taküm aser tanüla kümzüktsübaji asenok nisung shia khuret asütsüla ta paisa ayongzük.
Iba sentong nung Prodigal Home nung ketdangser Wb.Maong Jamiri Lai zünga sarasadem aser Wr.Sentirenla Amri menden liasü.