Teimla Tasen Ola Ka

– Takolong Ao, Chuchuyimpang.

Tanü asen Naga lima raksaba agi anung tongogo, kechiba ta sürabang shi ango den anogoshia chiyongner, saka mapa inyakner mali. Oda anogoshia tiazü otsü jembia (easy money) kodasür angutsü ta bilema jajaba nisungtem tanü asen lima nung joko noklang shilem nung 90% junga tokogo, ya koda asütsü. Oda tebu mesüra tetsü office nung ita sen tera anguba dakji alaka kidang alir shingaia anogo nung sen 100 jenjang tanga mapa meinyaktetba ajanga kibong tia indang tepang agi ashitsü makokba timtem tulu economic famine, ayawara agi talisa asen Aor kibong aika menepba tokogo, ya koda asütsü. Tanü asen Ao kin lanurtem zünger mapa mangurtem zünger mezüngdangtet küm shia nungtena ayuba agi joko teshinem adoker. America lima nunga zünger mapa manguba tongpang tulu ya akoktsü lenmang sadema madoker, anungji asen Naga lima nungbo oda kanga tajunger ka mesüra ana dak alaka govt. mapa angutsü asoshi lenmang mali. Anungji oda pa or la degree tulu ka angubaji tuluba masü, saka pai/lai ner kibong aser alima asoshi kechi koma mapa ka alima dang sayur ibaji tuluba. Tanü talisa asen Aor chanu zünger mapa mangubapurtem asoshi teimla tasen ola ka ayimoktsür. Tanü asen Ao chanu zünger mapa mangurtem Kohima mesüra Mokokchung nung mapang indoktsü nüngdak madoker, saka pei tepok mesütsü mesüra kibong tashi anisüngzüka alitsü mapa tajung ka inyaktsü anunga alibaji Dimapur City nung asen Aor chanu rickshaw driver tajemba agi 2000 (two thousand) nüngdaker. Kodang tazüngertemi Dimapur limaji Auto Driver ajak asen Aor chanu meyong dang südir Non-local temjia jena aotsü, kechiaser kodang Aor chanu nisung 10 alidak non local nisung ka südir parnok ayang majungtsü, idangji dang asen Naga nungertemi meinyaki aliba mapaji inyaktsüsa asen Naga nunger Rickshaw nungji amentsüsa mapangi bener arutsütsü. Lenmang tajung sayuba ama kodang mangdangji asangsang nung atalokdir obala nunger tepelaba agi tenük nungi nüktzü aluba jagi temulungjang tashitak ajak ajungtsü imlar. Tazünger driver 2000 merijang ana anogoshia washiba ola kisüng jagi Dimapur nung alir ajak amo agi ashitsü, aser oda ola tashi agi sadema atoktsü makoktsü. Adianu tajung na kong lir (?) lenmang kar sayur, Auto Rickshaw tasen ka jenjangji 1,50,000 (one lakh fifty thousand) shi lir. Ao lima asoshi parnok MLA nisung 11 (eleven members) lir, anungji election mapang sen meshia mechitsüi parnok atokdaktsür külen küm shia MLA kati par constituency nung nisung 20 yaritetra parnok (11) jagibo küm 5 nungbo nisung 1,100 tashi Govt mapa angur ama asütsü, kechiaser yimtsüng development mesüra town asoshi center nungi development tapu balala lir, aser itemji ochishia amshira aji teperi. Aji dang masü saka Arogo mesüra mission board tulu ajanga azü tajung tazüngertem nem loan agüja (good Samaritian) mapa agi yaritet, kechiaser tepang tesa agi Yisu indang jembia kazüba jagi majungtsü, saka mapa tajung nüngdak, kechiaser Dimapur lima osang tajungji angashidangerang obala nunger iba lima nungi pelaseta pila onüba nükjidong nung iba oset ya ajanga asen Aor chanu tazünger tem ayongzüker.

Kuknalim.