Teindang lenir !

Nagaland nung tang meimlaika Dr.Shürhozelie Liezietsu chief minister akümba ya Nagaland kümli nungi yimten nung yimsüsüa arurtem rongnung ajak dang teindangba nisung ka shima sempet ka agütsüba amai lir. Aji oda, tang mapang tatsüka atema pai raktepba agi masü saka tensa mapang agi chief minister asütsüsa akümbaji pai aazükba pa dak alang sempet ka angur asütsü. Arishi küm 81 tain Dr.Shürhozelie ya akhidang Gauhati University nung Economics nung B.A. Honours anguba nisung aser ano par Tenyidie oshi nunga M.A jenjang anguba tashitemeteter ka lir. Pai pa akümli tepiyong inyaktsü shimtetba mapaji yimten yimsüsüba mapa liasü, anungji Nagaland kümli nungi ‘An tepong’ telok nung dena aruba tangar oli aruli ta senzüaka paibo an tepong telok ya kenüa metoktsüi kümzüka aruogo. Iba tenlaji reprangteta tang nisungtemi dang masü saka Tsüngrem teka dena aluagi iba menden ya agütsü südi ta amanger. Dr.Shürhozelie ya tamasayongi 1963 küm nungi “Regional Party” United Front of Nagaland (UFN) telok  nung tongti zülur inyaka aru aser UFN telok nung jagi  United Democratic Front (UDF) ta melen aser UDF nungi Naga National Democratic Party (NNDP) ta melen aser ano NNDP nungi Naga People’s Council (NPC) ta melen aser tang tesüsa 2003 küm NPC nungi Nagaland people’s Front (NPF) ta melener 2017 küm tashi nung küm 54 tashi Dr.Shurhozelei-i Nagaland nung Regional Party ya pa kija meyong amai kanga meima aser apayua tenzüka aruogo. 1963 küm nungi Nagaland tatar senden nung tatar inyakertem rongnung reprangdangra, nisung anasemka dak alaka yimsüsürtem ajak mapang mapang shia party melentepa dena aruba angutsü. Aji oda, tanga NPF teloki aniba Democratic Alliance of Nagaland (DAN) nung dena aliba yimten yimsüsürtem shia taküm otsüji reprangdangra ajak amato party tapu balala nung dendanga arur NPF nung adenba purtem angutsü. Ajisüaka, tensa tajung majung aser takok aser tamakok anguba anogo ajak nung yimten tangatetba nung marakzüi nokdaka aruba nisung, Dr.Shurhozelie ama ka chief minister akümbaji meraketa bilemer. Atangji, Nagaland nung taoba küm 14 jakdangbo regional party asoshi tamakok aser maksü ajuruba anogotem dang liasü, anungji item tensa mapangji metizükteti aikati an tepong telok toktsür ao. Iba ama mapang ka nung teimla samar Shurhozelie ama katia pei telok toktsü asübo, ashiko, tanü an tepong telok ya Nagaland nung samar lila ta bilemer. Küm 50 jakdang Shurhozelie nunger zünga purtemi Nagaland nung yimsüsüa aruba otsüji pei taküm agi tendanga tensa tamajung nung Naga nunger tamachi amai aliba tia nungi nüchi küma anitetba otsü lir. Parnok mapang nung Nagaland asoshi India government-i lemzüktsüba senotsü nübortem dang miimzüka achitsübaji tebilema mebilem. Aji oda, par mapang yangluba lenmang, school aser mozü kitem tanü putu nung teyanglushia meyanglushitetter. Itemji tanü lanur putu asoshi tayongzükba tulu asütsü. Aji oda, tanü Nagaland nung akaba ajak raksamar aser sangküm arutsüba senotsü dena apusema chimar, asüng Nagaland kechika küma aotsüar memetetba tia ka nung alidang, Nagaland tenzük dang nungi tanü tashi yimten nung kenüa maitsüi indangindanga nokdaka aruba nisung ka chief minister akümbaji asüng lanu putu asoshi Naga yimten yanglushia toktsütsü atema Tsüngremi yok südi ta bilemer. Atangji, Nagaland shirangba tashidak ya ochimashi tashidak lir aser ochimashi mapa küm aika inyaka aruba agi joko Nagaland nung ochi mali kümogo. Iba ochiji tamasa Chief minister office nung shia arudaktsütsüla aser yimten inyakyim ajak raksar office ajak nung pei sünütsü dang süa inyaka aliba ochimashi sobaliba ya ochishia inyakba sobaliba agi melentsütsü Shürhozelie dak nungi imlar. Atangji, pa ita ishika dang alitsü, anungji pai ashi ama paia sayatenyabo meinyaktettsü, ajisüaka nisungi akoktsüba tashibo inyaka asen lima nung ochi laoa aliba ya nokdakdaktsüra, ibajiang lanurtem asoshi  Nagaland nung mezüng yimsüsürtem, Shürhozelei nunger teindang putu nungi anguba senmang tajungtiba asütsü.