Teintet Rogo Ola

 ~  I.SHILU JAMIR, DIMAPUR, A SENIOR CITIZEN 2017

Teintet Rogo ajak tenüng nung nübur ajak dangi salem abener.
Tsüngrem taochi temeim tulu ajanga tanü iba küm Teintet Rogo anogo tajung anema lia ajurudaktsüba yong Pa tenüng asanger.
Hau nih! Oda taküm aika tenük tepu jener, narong jaker, nükpoker kümer, kupu puzüker tepu tsükmar tesa liakasa oda Alima nübur, ABAM aser Arogoi küm shia iba anogo shimteta mongtsüba ya Maongka ulura-ani ta kangasa peladi.
Iba anogo tajung nung saakli nungi chirnur aser kiyonger metemer temi longpanga salem ashidang pelar. Ano iba temeja anogo nung, Arogoi nüngtem sendong tajung yanglur sentep nung Youth Deptt. aser telok palalai tenla ki sobo tepur junga ting ta yanglua renemer ano instrument tapu palala amshia ken tajung tentsüdang kanga jangratema pelaseter.
Ano Rev – Pastori anir Arogo lennir tajungtem aser Tsüngrem nisungtemi tanüla saksalemdakja anema aliba sempet aser arishi talang meshija aser sayutsüngi o tajung shia, sarasademja, teintet Rogo moatsüdang pelaseta tanüla temoatsü den ali shi nung dena tashi tasen angur.
Teintet Rogo aikati yamai bilemer südi aser jembir.
1. Ni ya joko tagidak makaba taküm.
2. Joko lokti nung kecha shilem maka.
3. Joko ni kecha mesütetsü tangari mezüngshir.
4. Ni jangraba tajung jembia inyakyongbo nübur ajakibo manang.
5. Nikong anüi tsük marar ama kümogo.
Aji oda yamaji kodanga mebilemli, leperi mai tashi sempet yari tajungtiba agi Tsüngrem tenzüka liang ta Laishibai ashri aji Tsüngremer ozüng ta mamadokli, takoktsü ta sür, ano ken tanur kümshir tajungtiba pei tashi sempet amshia Tsüngrem aser nübur tenzüka tanbur küma aodang temulung ila-a shisa metemli pelaa asen teyanglur dak jenokdi.
Sarasadema anogodok shia kodak len penzüa lia atar pa tashi nung arishi tempanger kodak nung Yisu den alitsü nükla tejangja renemer yongyaseta atatsü koda jangratemtsü lir.
Tanü amai nenoki onok alaashia metoktsüi nungita meima anebaludang Tsüngrem taochi tali jungkai adoka meteter. Teintet Rogotem ajaki pelaseta asen taküm lidaktsüsang dang nenok ajak onok ama arishia lidakjang ni ta moaja sarasademtsür.
Solomon tambur akümdang sayutsüngir kaküt zülutsüba medem, Teintet rogotem arishi tembanger iba ainer lima toktsür maodangsa teyanglur Tsüngrem aser nübur asoshi langka tajung tila kabosa nisung shiai inyaktettsü taochi tashi moajang ta sarasadem jang ni. T.K. 71:18 nung ashiba ama, “Au oh Tsüngrem taruba putu dang ni nü indang memetetdaktsü tashi, ni tampur aser kupu pua akümdanga nai ni tesendokma” Teintet rogotem ajaki yamaji pa taochi meshizüka-a teti sarasadema lia adatsü ayongzüker.
Asenok taküm lemang talangka jaja-a arudang arishi piyong taküm nung tajangshiba tapu aika ajurubatem ya teyangluri pa taochi kut agi ameter asen takum len anir aruba ta bilemteta züngdanga nübur rongnung kulisüba agi temoatsütem lemsateptsü asoshi ajak sentsü khuret kar ta rajemdi, kechisarina asoshi tatempang ka lir. Anü, Ita, Petinu manga adoktsü. Karbo arishi liaka, oda mejembitetba, mereprangtetba, mangashitetba item tiya agia asen dak atongtsüa akok, kechiyong iba akhümli nung arishitem taküm pei pei tiya palala ajurua arishi tempangtsü ali nungji “Ammang marudang asen shilem inyakdi.” Ammang arur inyakang. Anepdang sangwa nung” ta ken jagi asen den jembir.
Teintet tsüraburtem, metemsortem, taribi lisü metokdang dang, Hon susa mejakrepdang, tzübu nung tzüshi mejakrepdang, tongtiret nung tashi meiti makümdang asen teyanglur taochi tulu bilemtetdi. Aji oda asen taküm ya aoyi aser mepet tzüsü tangola ama ka dang lir, Tsüngrem dak matsüklokra kecha anisüngzük maka anungji Tsüngremi mulungba ama altisü, pa sendong nung jajatsü tang ya senti mapang tajungji lir.
Teintet senso tajungtem, asenok ya Alima nübur aser lanur shisa arangshidak ta metetdi. Temsen putu nübur asoshi temoatsü, tzüpokdak ka küma lia asen arishia taküm toktsüba temoatsütem mamadoki lemsateba lidi ta ayongzüker.
Yisu taochi-i nübur ajak moajangma.
Amen.