Tejakleni aotsü asoshi taremzü (T. Ken 75:1-10)

“Anungji Tsüngremi mapang tetemsü nung nenok uludaktsütsü asoshi nenoki nenok sasa Pa tashi taitba teka kübok ajemalua kümang.” (1 Peter 5:6).
Semtu Benjung tonga aru. Yisu adianutemi Benjung jagi orr nübur madak sayatenya mapa inyaktsü ajungshi. Parnoki ashi, “Nübur atema bilemer shingaia miima meinyaker” (Yn. 7:4). Pa telangzübaji reprangang: “Kü mapang ano matong; nenok atema mashi mapang ka shidak asütsü akok” (t.6).
Pa adianutemi tejakleni aotsü ajungshia Yisui yimya tajung agi parnoki ashiba songtem. Yimya nisungi Tsüngrem mapa mangatetter aser shi nisungi Tsüngrem anemer ta Pai metetta liasü (1 Kor. 2:14). Tamajunglen ajungshiba O agiba ajanga sayutsüngir aikati Tsüngremi mulungba aika zütoker. Minister aikati shi tejangraba tsütsüleni aodang Khristan tenzükba mapaji rongsen bushiba lenmang ka ama kümdaktsür. Shi jangraba aser Tanela meyoktepdaktsür. Seraphimi asenok dang kechi lesson sayur reprangang, “Pa tashikang pa tejak aser tetsüng nembang” (Isa. 6:2,3).
Temaba jenjangi atutsübaji temaba nungi arur ta Yisui metetta liasü (T.Ken 75:6,7). Iba takang tamang ajanga arem nung tatitangba dang “masü” ta ashi (Mt. 4:8-10). Temokok ajaki Pa tsüngdang apudaktsü Tebui mulungba mapang Pai aremzüka ata (Fil. 2:9-11). Kodang Pai amtsük pungu aser ango anati nisung meyirijang pungupu chiyongdaktsüba nüburtemi angu, parnoki Pa pur chuba kümdaktsütsü bilem. Saka Pai kisüng tenemleni atu (Yn. 6:15). Pai mekurai Pa kisüng tenemleni atu (Yn. 6:15).
Peteri Tsüngrem teka tashi kübok parnok sasa ajemalua alitsü tanurtem ajungshi aser Pa mapang Pai parnok ulutsütsü ta ajungshi (1 Pet. 5:6). Tsüngremi asenok asoshi latetta akaba menden nung nisungi menendaktsütsü makok. Ochi mashiba ajak Tsüngremi bentettsütsü. Asenoki iba ochi tekaraba nung angazükbaji tajungba Peisasa ulubaji asenok sasa Satan ket nung agütsüba lir. Tatembangji tesasatsü alitsü.
O Tsüngrem, ni asoshi Ne mapang amanga aremzüka atatsü taremzük jakla kua. Amen.