Tejang matangpa süngdong

– Süpongnungsang Longkümer, Darogapathar Village Dimapur.

Nisungtemi Tsüngrem nungi pilar alitsü meranger ashi Tsüngremi meimchir kodanga mesendoker. Nisungi Tsüngrem memetet, mangashi ta masü kechiaser Tsüngrem Tsüngrem ta ajak pang nungi adoker. Kechaser tepelatsü, mesüra tejashitsü atalokdang mejempii meliteter Tetezü Teyanglur Tsüngrem meteter saka asaa pei inyaknütsü inyaker.
Süngjang atangtsüba, matangpa süngdong ji küm aika tejang atangtsü yongya atar saka metangra tsüngküm meshidak ka nung atem anungji ali janaa mayutsü ta sür leptoka intoker aser mi nung aronger. Tsüngremi tsünüpa süngdongji mesütsü atema chiyongtsü aser tapu ajak pai renema yutsü aser kar shimtetta süngdongtemji nükdaktsür. Küm aika atar saka süngdongji tapongla tejang matangla, anungji kibur arua süngdongji yanglushir (Horticulture mapa, Tejang matangpa süngdong tem nungi lentoker tejang atangpa süngdong amenloka tejang tangdaktsüba ama) Tsüngremi pa sayatenya mapa, aser meimchir dang meimba tamaitsü nu menden lapokja tetsü pok nung yangluba Tsüngrem nisung ajanga obendang mapa, aser aeinket mapa meimchir rongnung inyakdaktsübaji Tsüngrem lima nung pa temeim tesüngmangtsü. Israel nunger atema Mana, Opiya, aser tzü dang masü anüngdang mepet tongshi, aser aonung mi tongshi agi teti parnok ania liaka temulung merangjen meranga Tsüngrem amadoka aser Tsüngrem chir tepset. Kasa asen kin ten a Tsüngremi shimtetpa lenmang aika nungi sayur. Meyitkartemi meyitaka mapa shidak meinyakpa agi mapaji tapong aküm. Anungji meyitkarji pa taa angutsü saka meimchirtem atema pai mapa yanglushitsütsü Tsüngrem nükjidong aser pa temeim tarok lir. Yimsüsürtema meyitkar, Tsüngrem tenzükertema meyitkar parnok ajaki lenmang palala nungi meimchir azüoker.
Mapang medongjongei asenoki Tsüngmok a amoka kümdanga alitsü atema lenmang aeisü nungi Tsüngrem den azüngashia, asenok dang masü bendanger a ayongmesur yamaji bendangertemibo jembiba ama inyaker saka asenokbo mapang tatong nung jembiba ajak amajok kümdaktsür. Küblakübbu (Mulunglemtsü mali) seblasepshi ta ajatsüa malang khen agi tagidak maka Clean Election ayongzük saka ka dang sen meshia penür yimtsüngi oa atok, iba ama dang ochi mashi agi laktetogo anungji ochi yimsüsür aginür ta ayimoktsü saka yimsüsür majung masü nüpurtem 95% Clean ayongzüka yutsü saka polling spot nung sarasadema ken tena anüktsü melena ajak jenmar, yimsüsürtem bushiaka mangu nüpur kong jenoktsü. Tsüngremia election mapang nungpo nenok inyaknütsü inyakang ta shir aeinshia ao ama, iba tensa nungpo kecha ozüng mali ama yimsüsürtemia odang toktsür süra anogo tasen dak iba mangyang yangtep nung yimsüsürtemi kechi shitettsü, taremzük alir temi mangyang mangyanger ashi yimsüsürtemi khuret koktettima ta bilemtsür.
Ocet züluba ya khen nung züngma züngra angateter saka abensa zülunüdang anaben asemben atongsa adoktsüsa akümer idangji aiben ajaki mezüngteter anungji tongmelang agi zülutsür saka ajia abensa mangatetra amajok. Meyitkar indang Lai dak ajemdaker adoktsü saka mangajem ama bilemba agi meyiper adokshitsür.