Tejangja Bru nunger refugee tem meyipa arudaktsütsü: CM

Aizwal, March 28 (Agencies): Mizoram Chief Minister Lal Thanhawla-i Mongolbarnü ashiba agi, state sorkari Tripura nung jenoka aliba Bru refugee tem Mizoram nungi ta asüba kuli tejangja lira state-i meyipa pelalashishia agizüktsü.
State assembly nung Bru nunger state-i meyipa arutsüba ken o nung lemtepdang, Lal Thanhawla-i ashiba agi, Bru nungertemi parnok melongka nung state toktsür ao. Bru nung telongpurtemi amokmerenaka parnok aika state toktsü mao.
Maneni chief minister-i ashiba agi, pai state nung Bru nunger densema kin kecha atema autonomous district council balaka kümtettsü asoshi temalaba magütsütsü.
Minister R Lalzirliana-i Bru nungertemi parnok atema autonomous district council balaka kümtettsü asoshi Supreme Court nung benoka aliba indang jembidang CM-i iba telangzüba agütsü.
Iba ken o adokba mapang nung aliba Union Home Minister Lal Krishna Advani-i Bur nunger Hindu tamangba yimsü nung anidakertem asüba agi Mizoram sorkar aser nüburtemi timtemdaktsü, ta aitsüba paisa shisem.
“Ni Advani nem telangzüba yamai agütsür; Bru nungertem Hindu yimsü nung anidakertem masü, parnok alima yimya balala dak amangertem lir, aser timba ka Khristan kümogo,” ta pai ashi.
Mizoram nung Bru nunger aliba tesemtem nung Hindu nunger tekülem ki 28 rongdoktsü ta aitsübaji tiyazü lir, kechiyong yamala temple Bru nunger aliba tesem nung maliasü, ta pai shisem.
2016 küm November ita 2 nungi 23 tashi nung Mizoram sorkari asadangba nung Tripura relief camp 6 nung aliba Bru nunger kibong 5,407 Mizoram nung lia aliba kibongtem lir ta jangjaogo. Relief camp nung alirtem rongnung parnok 10, 763-bo Mizoram voters list nung züngsema lir, ta home minister-i ashi.