Tejangja, temulung lemtsü, pukümer -T. Ken 118:1-9

“Kibuba kü tsütsü lir: ni metsübutsü: nisungi kü dang kechi inyaktettsü” (t.6). “Tsüngrem asenok asoshi lira asenok anema shiba arutsü?” (Rom 8:31). Alima rangben Tsüngrem asenok tsütsü lir- Tebu, Techir aser Tanela Temeshi. Tetsübu mali shibai asenok anema arutsü, Pa asenok tsütsü lir.
Ibai temulunglemtsü o lir. “Ni metsübutsü.” Ni tesüiba mapa meyipa reprangra Tsüngremi kü mera nüka aliba ni angur. Ni tang mapang reprangra, Pa kü den lir ta ni metet. Ni tarutsü dak reprangra, kü jakdang Pa lir ta ni metet. Pai ni awabanga lir. Pai nangzük, “Ni ne dang kodakang temulung melemi malitsü, mesüra ni na kodakang metoktsütsü” (Ibri 13:5). Ni langzü “Ni metsübutsü. Nisungi kü dang kechi inyaktet” (t.6).
Tatemsa, ibai tebuakümba o lir. “Nisungi kü dang kechi inyaktet?” O ka nung Tsüngrem tsübuang, meimchir masü. Yisui nütsüngtem dang ya sayu, “Shibai temang tepseter saka tanela tepsettsü makok, pa masü saka shibai temang aser tanela tepseter aser molumii yoktsü akoker, pa tsübuang” (Matt. 10:28).
Kodang nai Tsüngrem tsübudir, tangar tsübutsü menüngdaker. Tsüngrem tsübuba tetezü, Pa akhümtsübuba aser meimba lir.
Na kechi tia nung lidir liang, Kibuba ne tsütsü lir. Nai tesüiba, tang, aser tarutsü mesüra shibai kechi inyaktsü tsübua alitsü menüngdak, kechiaser nai Tsüngrem tsübur. Pa tenangzükba o tem mulunglemtsü lir aser Pa ne pukümer lir.