Tejashi tapu ana

Alima nung tejashi lir, anungji alima nung alir ajak kenkenbo jashitsü. Ajisüaka, tejashi ajuruba ajakji temenen masü saka Tsüngremi mulungbalen jashiba tejashia lir ta 2 Korint 7:10 nung angateter. Iba Laishiba tekong nung ashir, ” Kechiyong Tsüngremi mulungba amato jashidaktsüba agi tanaben mesasatsüsa tekümtet asoshi temulung meyipdaktsür saka alima tejashibai tasüba adokdaktsür.” Aji oda, Tsüngremi mulungbalen jashiba o alimai mulungbalen jashiba na tetsüngda aser tepilaji talangka lir. Atangji, tejashi tapu anaprongla agi mulung kanga zürepdaktsür. Ajisüaka, tejashi koba agi Tsüngrem bushidaktsür aser teti atema tekümtet angur, ibaji Tsüngremi mulungba tejashi saka tejashi koba agi Tsüngrem nungi piladaktsür aser tasüba ajurur, ibaji alimai mulungba tejashiji asütsü. Khenkhen nai mapa tai kar inyakba agi na kanga jashitsüa akok mesüra mapa kar nung tamakok ngur Tsüngrem aser nisung anema jashia bilemtsüa akok, ajisüaka nai na jashitsüsa inyakba agi tekümtet asü tasüba bushir, ibaji nü dak dang keta lir. Alima nung aibelen masür mali, anungji mejashidangera shinga mali, saka na jashiba agi na samatsüsa jashira iba ama tejashijibo Tsüngremi maginer. Asenok ajaki Yihuda Iskariot jashiba otsü meteta lir. Pai par lenir Tsüngrem chir Yisu Khrista taribi sen semeryong ayok. Iba mapang taribi sen semerji alar ka jenjang liasü. Yisu Khrista ayokba sen aser mapa jagi pasasa pa kanga jashia aküm. Ajisüaka, pai par kibur Yisu Khrista bushia orr taidok bushitsü mebilemtet aser par medemer Yisu Khrista nütsüng terka toa bushia mao, saka azümeyangdak ka bushia orr pai pasasa soseta asü. Yihuda Iskarioti pa tejashiji Yisu dangi masü puti ungertem dangi oa süngzüktsü merang, saka parnoki pa magizük, anungji pa jashiba agi tasüba adokdaktsü. Aji oda, Yihuda Iskariot jashiba tejashiji alima tejashi aser temeneni mulungba leni aniba tejashi liasü. Iba jagi pa tasüdaki anir ao. Ajisüaka, ano külen Yisu Khrista Yihuda nungertemi pua bener orr temaba putir kidang yua aliba mapang Peteria par kibur Yisu Khrista menangzük. Iba sülen Peter kanga jashia akümnungji tejashi marem pai kanga ajep (Luke 22 : 62). Ajisüaka, Yihuda Iskariot jashiba o Peter jashiba na balala liasü. Peteri par Kibuba menangzükba atema kanga sasa bilem aser taidok nangzük. Idangyongjisa Peter taküm tajungba melenshi aser tamang nung tasü taitba aküm. Peteri jepa taidok meshiba  Yisui metet aser Pa shia arur külen Yisu Khristai Pa tsüngdang Peter nem tenangzükba tulu agidaktsü (Yohan 21 :15-17).  Yisu tasütsü mapang pa dena pua reshikangshitsü tsübuba agi Yisu Khristaji par tesayur aser Kibur ta menangzüktetaka, kodang Peter taküm melenshi pai pa taküm Yisu Khrista atema asütsü metsübu. Aji oda, pai pa taküm Yisu asoshi bendanga agütsü. Yihuda nungertemi Yisu pua alidang Peteri Pa ken menangzükba dak alaka, iba sülenbo Peter taküm nung Yisu atema inyakdang timtem reshikangshi jenti ajuruaka, pai kodanga Yisu menangzüki medoktsü. Ken aibelenba ajanga kanga jashi saka iba tejashi jagi Peter taküm melenshi aser tekümtet angur. Aji oda, asenok kenken kanga jashitsüsa ataloktsüa akok, saka asenok jashiba agi asenok tasüdaki anitsüsa mesüra Tsüngrem tsüngdang nungi pilatsüsa asenoki meinyaktsü tim. Atangji, asenoki aibelendang kanga jashia aiter aser sasar saka tesasaba kija jagi na Tsüngrem tsüngdang taidok mangutsü. Ajisüaka, tanüla  temeshi nem nü temenenji jungkai adoka sayudakjang. Tsüngremi na jashiba, na sasaba aser nü menen indangji komaka bilemer, ibaji tanüla nem shidakjang. Aji oda, kodang Tsüngrem tsütsü nungi nai nü temenenji ngudir, idangjiang Tsüngremi aginüba ama na jashitsü. Ibaji dang nü temenen asoshi taidok nangzükba mapang asütsü. Iba tejashi jagi dang Tsüngremi na agizüktsü, na moatsütsü aser tejashi agi tepela melentsütsü.