Tejashwi Yadav-i IT department aitsür

Patna, June 20 (Agencies): Income Tax ketdangsertemi RJD tir Lalu Yadav’er kinungertem kiojenten mita aoba sülen Lalu’er jabaso aser Bihar Deputy Chief Minister Tejashwi Yadav-i iba mapa ya yimtenren nung ajemdaker inyakba lir ta aitsüogo.
“Iba ya yimtenren onük nung ajemdaker inyakba mapa ka lir. Kuli kecha melii ozü dak tai tongloktsür. Onoki kecha miimbanga mayur aser asüngdangya süra, onoki langzütsü renema lir” ta Tejashwi Yadav-i ashi.
Mongulbarnü Income Tax department-i Deputy CM Tejashwi Yadav, Lalu Prasad Yadav kinungtsü Rabri Devi aser jala Misa Bharti nungertem Benami Transactions Act kübok ken o benok.
Income Tax department-i Misa Bharti aser la kinungbo Shailesh Kumar, Tejashwi Yadav, Rabri Devi, aser Ragini o Chanda Yadav nungertem indang kimung 12 sota lir. Parnokisa Lalu Prasad’er kibong anema attachment notice ka agütsüogo aser iba sen crore 9 indang rongsentem lir.