Tejen aser Tasen Lai nungi tangazüktsü

~  S. PANGER ( Akhoya)

Abram ya mezüng Tsüngremi jatetba tamang tenzüksang lir. Temetetsü kaji Tsüngremi nisung asoshi sentong balala yuja lir. Abram nungi Isreal nübor jakzüka aruba Tanüla aser taküm otsü agidi.

1.   Farao dang Abrami pa kinüngtsü Saraji pai kuno lir ta ashi. Lip 12:12
2.   Abram jabaso Isaki pa kinüngtsü Rebeka ji kuno lir ta Abimelek dang ashi. Lipok 26:6-9
3.   Isak jabaso Yakobi tebu dang ni mezüng jabaso ta ashi, Lipok 27:19 (saka mezüng jabasobo Isau liasü)
4.   Yakob chirtemi tebu Yakob dang par chir Yosef shiruru tesashi kati shisa nguset ta ashi. Lipok 37:31-34.

Rom 3:23 nung ashiba ama, nisung ajaki temenen mena aser Tsüngrem sentsüwangshi matong.  Nisung ajak tashi mait lir, Tsüngrem sentong ataloktsü tejen lai otsü nung aji oda ataloka aru. Anitet 34: 6-7 nung ashi ama, puto 4 tashi Tsüngremi moatsür ano yamaji atakatem lir. Abrahami Farao tsübuba agi tiyazü jembitsü lemtet aser jembi, yongji Putu pezü buba tashi tatishitsü Yakub chirtemi tiyazü jembi. Saka otsü ajakji tajungren nung tembang.

Shibai prok paisa arutsü, nü tia nü ket nung lir, Isreal senmang aser teimlaji alima nung lir, saka Arogo teimlaji kotak, yangji ajak sentaka lir. Tasen Lai putu nung teimlaji Kotak senmang lir. Yisui ashi, Tanüla nung kechi sodir aji Tanüla, saka shi nung kechi sodir aji shi. Yh 3: 6. Anungji T.Mapa 2: 38 nung ashi ama, nenok temolung meyipang aser temenen nangzükang aser nenoki Tanüla Temeshi sempet agizüktsü.

Tangatetsü kaji; shi taküm nung inyaka ajangshiba ajak taa angutsü, taküm tasen kuma tanaben aso, tekümtet aka, saka ali taküm nung timtem angutsü akok. Chia ajemer ka temang tashitak alitsü; mapa meinyakra tajangzük makatsü.

David-i Oria tepset (tasa tamajung) pai sarasadem, Tsüngremi tatok agütsü, saka par kibong nungi noklangnok magien. A.Shin 28: 13 Shibai ozüng raksaba meimdir azükaru masütsü; Saka shibai itemji nangzükdir aser doktsüdir yimlibilem angutsü. Anungji tang nungi tanga melenshira Tsüngremi nangzükba ajak tajung angutsü.