Tejen yimsü yimpong dangi meyiptsü ABAM-i nokdangba nung kü tangatetba

~ Talitemjen Imchen.

Tanü alima manger mesangwa nung tajungleni melenshia ainba mapang ka, Ao Baptist Arogo Mongdangi, “Tejen Yimsü Yimpong Dangi Meyiptsü Nokdanger” ta kenteter zülutsüsa akümba ji tesasatsü ka dang lir. Ashiko, ABAM küpok alir netsüngtem kari keno azüngashitep ajanga temeden aginü südi ?
Tejen putu mapang zülu maka den nisunger libaliro aser shisatsü kanga tongmelang sür aruba asenoki meteta lir. Par putu azüngashitep aser anempong nungji, ana yongtsü nung pei pei meden kuli agüjaa arrlung azüngteptsü, ali chiteptsü mesüra shiruru taküm alangdoka pei meden kuli agütsütepa etc, “Kü/onok kulitem nung tai lira atakatem ajakji Ni/onok dak kaodangjang,” ta Sobatiaba tsüngdang azüngashitep. Aser anogo atakteta yongkokzünger anempong ji tenzük. Anempong anogo mapang, shir telok mesüra shiba dak tama kidang kiset shiruru mesüra kibong nung manemmachi lidir mesüra atsükalokdir, Sobatiabai parji memedentsür ta amanga, par nem alimai temeden magütsü. Tanübo tasenba, zülu putu, mangatettepi keno mekümi ana yongtsü nung sümetemtetba putu. Kar mesümetemi keno adok nunga, tasenba aser tajungba anempong aser asüngashitep obendangdak sapang balala aika lir (Council obendang, Dobashi obendang, High Court aser Supreme Court etc). ABAM Executive Secretary jia mesüra Laishirtem jia aibelenra, netsüngtem den kasa item court ka nung obendangtsü. Aser alima ozüng nung aliba ama aibelen yari temerenshi ji angutsü. Kechiaser alima nungbo TANELAR COURT masü saka SHI COURT ji tuluba lir.
Temzüng kaji alima ainba den apet yangluloker. Tatishitsü, tanübo asenok den Hindu aser Muslim temeyoktep lokti senden mali, Christian tamangertem dang asüba agi telok nung o jembidang, Laishiba nungi tekong balala kenteter onük nung inoksema, jangratema jembiteper. Saka kodang tanga limai odir mesüra asüng yimsoshiba (civilization) tasen nung, item tamangba balala den meyokteper lokti senden alidangji, Laishiba tekong nungi agiteta ajungshitep nung telokji mapettsü. Parnokia Gita mesüra Quran nungi tekongtem agiteta lokti sendenji ajungshitep nung asenokia mepelatsü. Item amala mesükba nung sendaka, “No Place Of Worship In Public Places” ta Supreme Courti 31st July 2009 kümji renem südi ta nibo bilemer.
“Tetsüng Ana Saka Tekolak Ka” ta temang ka nung teyangluri yanglusem amaji, tamanger ka asoshi “Shi Temzüng aser Tanelar Temzüng” ji kasa tongtipang lir. Yamaji Ao kin asoshi nüburi sapua aruba temzüng amer tematiba tentet ana lir. SHI TEMZÜNG amerji AO SENDEN lir aser TANELAR TEMZÜNG amerji Baptist atema ABAM ji lir. Ao kin asoshi kanga tia taka, iba tentet ana nung takar sensaker tebendang mali, senotsü kecha meindoker saka temeden nung nübur mulung süa anguba tentettem lir. Aser Sept. 30th 2015 ocet ABAMi züluba ji, “Tejenba Azüngashitep Temeden Jibo ABAMibo Maginer Aser Memulunger” ta züluba ka dang nibo angateter. Aser parnoki netsüngtem dang ashitsü ji tim lir. Iba ji dang masü tejenba azüngashitep temeden jibo tasen lai tetuyubabo masü ta asenokia Lai o nungji angateter. ABAMi iba o shitetba atema, nibo ABAM chanu ka ama, pi tsüngdang nüma dangteta liogo aser kanga pelar.
Shir Sobaliba südir, sobaliba ya tajung leni metetloka ainba süngdong ka ama lir. Tang dang nungi tsüraburtem mesüra tetsü teboutemji memetetba aser mabensaba liasü ta asenok ajaki metet. “Taoba Mapang Shidi Postman Aaanga dang benshitepji tanüa Mobile Phone aliyonga, shidi zülur Postman ajanga dang benshiteptsü” ta dang tongmelangka bilem nungbo asenok sobalibaji metetloka ainba süngdong ka ama masütsü. Yamaji taoba mapang ABAM dang masü saka teloktesen inyakyim nungji, tanü putui tai mesüra mabensaba achitettsü akok. Aser item ajakji ashishi nungbo tejakleni mouteti atsüreptsü aser tatem nung sobaliba süngdongji asütsü mesüra rajang akümtsü.