“TEJEN YIMSÜ YIMPONG DANGI MEYIPYSÜ ABAM-I NOKDANGER” ABAM aser Nübur ajak dangi kü tayongzükba Ola Ka

~ J. Tali Pongen, Yimjenkimong, 

Temalen agüja aliba onük nung ajemdaker ABAM-i taküm September tom (14-09-2015) ka shi nungi tenzüka arogotem, tamangertem aser Linük tenzüker ajak dangi züluba shititem aser osang kaket nung adokba nüburtemi metetogo aser yangji nüburtem tangatetba balala aika osang kaket nung lemsatepba ngua aruogo.
Iba keno ya Yimjenkimong aser Changtongya yim ana tsüngda Khristan yimsü marudang tekolak bushitepba mapang Milak Tzü nung sobaliba yimli ka agüja aruba maparen dak aketba nungi mangatettep adokba otsüoren lir.
Iba keno Yimjenkimong aser Changtongya tsüngda küm aika (around 27 years) okadak balala nung rongsensa rongsen, nübusa nübu endoka, Khristan-a masü amai inyaktepa, jembitepa aser timtemtepa arur ano küm ishika tejaklen nungi (30/10/2008) iba kenoji tatembang ka aginüa Linük Tenzüker Okadak benoker jembia aru. Tzü Ali dak aketba keno asünung, aser Khristan yimsü tajung aruaka yimtsüng aika nung aser talisa Dobashi Court tashi nung asen sobaliba tajung yashi (15/04/1980) tashi yimtsüng aika nung inyaka aruba ama September 9, 2015 nung iba keno tatembangbuba obendang, aseni amangba Tsüngrem tenüng nung azüngashi agiteptsü asoshi Yimjenkimong aser Changtongya yim ana yimsüsür tsüngda mulungteper (sign sütepa renemer) anogo züngzükteper aliba mapang ABAM-i, ABAM Temzüng aser Laishiba Tesayuba tenüng atemer, ABAM nung Changtongya nunger tenzüker adianu tajung ana den Reverend aser Pastor aika aliba maongka nung ABAM-i judang yidangba sangdongogo. Iba keno dak aketba nung kü tangatetba kar ABAM dang asüngdangnür (Ya ABAM dangi Osang kaket ajanga dang yoker saka ibai Official ama agia ABAM Central Council matongdang nüngdak süra ABAM Sanen Luden ajungben jatepa jembia atatsü ABAM dang mepishia atar).
1. Laishiba aser ABAM Temzüngi memelabaji Yimjenkimong aser Changtongya yim ana tsüngda Azüngashiba ya dang asü ano tangaa lir ?
2. Kin kidong otsüoren dak sentakba nung kidong ka rangben (Khristan-tem) yimdak nungi aritoka (Sannüker kibong dena) ano Arogo nung Sannüker ka nem pei San ka asüba nung tepila sentep (Funeral) tashi magidaktsüi (Alima Temzüng agi) inyaktepdang to ABAM, ABAM kübok Revernd-tem aser külem Aoli Sannükertem kechi nung nokdaka liasü (No: AB0502/16, August 1, 2009 “Arogo Aser Yimten Tesendaktep/Tepila Tangatetba”nung dang asü ?).
3. Kasa kin kidong otsüoren dak sentakba atema ki shitsüba (angenbangtsüba) amala yaa koba tareni yoktsü ? (“Yimtsüng Telung Nung Atalokba ABAM-i Memetet” ta sür dang liteptsü asü ? Shitakba Khristan süra “Alupu Nung Menja Aponger Joko Matsükshishitepli”, Ao Milen 03-11-2015 O Semlok).
4. Laishibai tamanger ka Alima Okadaki (Court) maotsü sayua liaka Aor tamangertem aika Alima Okadaki aoba atema yaa kechi ashir? aser Okadak kenoji tatembang kati marutetra koma tembangtsü ABAM Tesayuba lir ? Asenoki Khrista dak amanger Küm 150 shi jungnüa arudang ABAM tesayuba kechi lir ?.
5. ABAM-i Ordination agütsüdang Revernd ka kibong, talisa kinüngtsü aser kinüngbo tsüngda koda alitsü sayua lir ? (Joko Laishiba nung nemettepa Ochi o jembiteptsü mapang tongja tongogo ta bilemer).
6. Yimjenkimong aser Changtongya yim ana tsüngda akhidang mangko bushitepba mapang Milak Tzü nung kechi inyaktepa aru ibajibo Tejen Yimsüyimpong rongnungji maden asü koda ? ABAM-i iba atema Changtongya dang kechi shidanga lir ?
Joko asen lima nung ABAM-i anir Laishibai sayuba ama Ochi o jembiteptsü aser inyakteptsü yongyaa aliba mapang ABAM-i tayongzükba tulu agütsü nung ABAM dang kanga pelar aser ibai tamanger ajaki mapa küma inyaktettsü mapang tajung ka arur ta kü bilemba aser tangatetba kar agütsür. Khrista dak amanger ajaki item ya jungjunga shisadanga mapa küma inyaktsü merangtepdi.