Teka mapatem meshira shisaliok angubaji mabensa asütsü: R Tohanba

Kohima, Sept. 10 (TYO): Tanü Municipal Affairs and Economics & Statistics Parliamentary Secretary, R. Tohanba-i, tekalen mapatem meshira shisaliok angubaji mabensa asütsü, ta metetdaktsü.
State Academy Hall, Kohima nung 26buba Yimchungrü Students’ Union Kohima (YSUK) lokti senden aser freshers meet nung tongti tesemdanger o jembidang Tohanba-i, “Tang ama tetoktepba putu ka nung shisaliok nguaka tekalen mapa memetetra majangzüktsü,” ta ashi.
Takok angutsü atema lenmang tezüba mali, ta shia pai kaketshirtem dang, tazüokba nung alitsüla, iba denji külemi shisaliok bushiba aser tekalen mapa naprong nung mapang kasa intoktsüla, ta ayongzük.
Apijemsü Shin 1:7 nung ajemdaker pai, kaketshirtemi Tsüngrem tsübua Pa dang nungi shisatsü meshitsüla, ta ayongzük.
“Temang, shisatsü aser tanela ajakji shisatsü ajanga tajungtiba küma arangshitsüla,” ta pai ashi.
1940s mapang nung shisaliok agi Yimchugrü tesem atong ta shia Parliamentary Secretary-i, Naga nunger nüchiso bushiba rara ajanga parnoki shisaliok junga mangu aser tesülen atsüngzüka liasü, ta tesasaba olen ka ashi.
Aji oda süaka tang shisaliok agi nüburtem kishizüng tongogo, anungji iba maongka agia shisaliok tajung bushitsüla aser Yimchungrü jenjang ajungkettsütsüla, ta paisa ashi.
“Tetoktepba balala nung takok angutsü atema junga renemshitsüla aser meranga inyaktsüla,” ta pai ajungshi.
Parliamentary Secretary-isa lanurtem dang, mezüngbuba nung kin nüburtem ka küma telongjem alitsüla, koba ajanga tangar kintem dena yimchiyimjung nung litettsü, ta ashi.
Iba sentong nung Tohanba-isa Drafting Committee Convenor, Kiutsüthong-i agütsüba YSUK temzüng tasenba sayatsü.
Kasa sentong nung tetushi tejaoker, Yimchungrü Gazetted Officers Association Tir, Dr. Pünsokiu-ia kaketshirtem dang, “Takok angutsü atema peisasa pei dak melung alemtsüla aser tamang akatsüla,” ta ayongzük
Iba dak alia Yimchungrü Union Kohima Tir, Kejingkhum aser YSUK tenteter Tir, Akum natia jembia liasü.
Yimchungrü Baptist Church Kohima (YBBK) Youth Pastor, Aroba-i temoatsü meshia sarasadema iba sentong tenzükba sülen YSUK Tir, Ason Kips-i lokti pelaa agizük aser Rünshito-i kaketshir tasenpurtem tenüng nung jembi.
Sentong nungsa YBBK Pastor, Longri Nungti-i tasenpurtem asoshi sarasademtsü, YSUK general secretary, Andrew-i tepela anküp o jembi aser YBBK Women Pastor, Yinsola-i sarasadema  sentong tembanga liasü.