Tekolak nung teküp ajakba kidang anepaluyim

Nisung aika tekolak nung teküp ajakba agi joko laka alitsü. Tekolak aser kou asoshi ibai tebilemtsü ka lir aser ya kanga bulua ajangshir. Khenkhenbo teküp ajakba ajanga tekolak kanga anaker aser iba mapang asenok tangar dang nüma metangteter. Tekolak nung teküp ajakba ya aisü agi jakdaktsür, ajisüaka timbaka ‘fungus’ ajanga jakdaktsür. Aji oda süaka kecha taoksatsü mali kechiba süra ‘fungi’ ya asenoki kidang dang junga anepaluba ajanga melamela samadaktsür.
Teküpoklen agüja aliba ama anepaluba ajanga tekolak nung teküp ajakba samatsü:-
Aloe Vera gel : Aloe vera agi ‘bacteria’ aser ‘fungus’ den rarateter aser ibaji ajanga teküp ajakba anendaktsüba nung kanga yarir. Aloe Vera gel ya tekolak kep nung minute 30 shi nüloka yuang aser iba sülen shampoo kanga tesashi masü kar agi loktokang.
Neem tuo menüngsaba : Neem tuo tera minute 30 shi tzü nung metang aser iba sülen touji menüngsar tekolak nung gondha ka shi nüa yur shitokang. Yamaji inyakba ajanga nü kou taoba mapang dang nungi tashi taitba akümba nai reprangtettsü.
Fenugreek paste : Fenugreek tejang ishika aonung sangwa tzü nung metena yuang aser aji menüngsar tekolak nung minute 30 shi nüloka yur tzü agi shitokang. Iba kasaji hopta pezü shi inyakang.
Vinegar : Vinegar agi tekolak nung teküp jakdangtsüba fungus aser bacteria tepseter. Ano Vinegar agisa tekolak anaknüba aser teküp konger aliba jungdaktsür. White Vinegar ishika tzü den meyokteper tekolak kep nung jungjunga lokang aser minute 30 shi yur tzü agi shitokang.
Süngodong nungi agizükba totzü (Tea tree oil) : Süngodong nungi agizükba totzü agi tekolak nung teküp ajakba kanga junga anepdaktsür kechiba süra iba totzü agi tekolak nung teküp adokdaktsüba fungus aser bacteria den kanga tashi itta rarateter. Iba totzü jang ka mesüra ana na teti amshiba shampoo nung jenoker teti takolak alokba ama lokang. Nai mapang tatsüka iba amaji inyakba sülen temelenshi angutsü.
(Source : Internet)