Tekolok tebilemtsü tashidak (mental illness)

Dr. Temsuyanger,
DPO RCH & UIP, Nodal Officer
District Mental Health Program, Mkg.

Kodang asenoki nisung kar tekolok tebilemtsü tashidak (Mental illness) agi timtema lir ta angashidir aikati aria bilemtsür, tsübua bilemer, arendaka mesüra rata bilemer. Ano karibo sendoka toktsür (Avoid). Asenoki angatetsü kaji, iba tekolok tebilemtsü tashidak ya tanga temang timtem amai kasa dang lir. Mapang shitak nung teyari bushia anepalura item timtem mapang talangka magii anüpadoker (recover). Anungji, Treatment aser mozü dak alaka kinunger, medemer aser loktii nungita yaritsü kanga dang tongtibang lir.
Tekolok tebilemtsü tashidak nung ya nisung ka tebilemba (Thought) aser yimya yimko (behaviour) nung meinprong (disturbance) adokba ajanga nisung ka taküm nung akhi ama liyonga aotsü makoker. Iba tekolok tebilemtsü tashidak ya tapu aika lemsaa lir. Item timtem ya genetic factors, temang nung biochemical imbalances mesüra environmental stress ajanga adoktsü akok. Saka timba ka kechiba adok aji memeteter/mebushiteter. Item rongnung bulua adokba timtem kar yamai lemsateper.
1. Anxiety Disorder:
Nisung ajak mapang mapang nung shisabolu ajurur aser aji tim dang saka, kodang iba Anxiety Disorder agi menepdir, nisung ka taküm nung aiben tetsükdaktsü ajurur. Pei taküm nung akhi ama liyonga ( normal life) aoba nung aiben timtem adokdaktsür. Tatishitsü agi:
a) Panic Disorder : Iba timtem nung ya nisung ka ajungbena mulungjang nung taoksatsü aser tsübuba aiter aser iba amala tsübua aitbaji mapang talangka melii süngjemadoker. Iba amala timtemji khen mapang ka dang majurur saka aiben ataloker (frequent attacks).Iba mapang nungji:
– Tongtonglatsü kara alitsü
– Mangmangtsü
– Temang atentenba alitsü
– Temang nungi asentsü alutsü
– Nongbanga atutsü.
– Temang nung tamajung ka ataloktsü ama tsübutsü.
b) Phobic disorder: Phobic disorder nung ya nisungi tensa (situation) mesüra oset (object) ka ajurudang/ angudang kanga tsübua aitba timtem ka lir. Iba ama tensaji ajurudang nisungba jagi iba tensaji mekokteti akümer aser iba ajanga pei taküm nung akhi ama liyonga aotsü makoker. Tatishitsü agi nisung karbo tayimtsü (aeroplane) nung amentsü tsübua bilemer, kechiaser iba ya anüng tom nung dang ayimer saka tensa agi amentsüsa adokra odang menteter. Saka kodang nisung kaji iba timtem (height phobia) ya lidir tayimtsü nung amentsüjibo doktsür airport-i aotsüa tsübuadoker. Iba amala tatishitsü ya tapu aika lir, koba ajanga nisung ka taküm nung aiben timtem aser tetsükdaktsü ajurur.
2. Mood Disorders:
Asenoki asen taküm nung khen khen tejashiba, pelaba mesüra ain adoker aser ibaji nisunger yimya dang. Saka kodang nisung ka iba timtem agi menepdir nisungba taküm nung pa/la Mood-ji aiben melenshiba ajurutsü/ angutsü. Iba ajanga nisung ka taküm nung timtem jenti adoker aser akhi ama liyonga aotsü makoker. Bulua adokba mood Disorder asemji :
a) Depressive symptoms kar yamai alitsü :
– Yakta mit/ain adoker
– Jashia dang alir.
– Teimla kecha mali ama bilemer
– Mapa inyaktsü mejangrar
– Süadok tajungba ta bilemer
– Aonung ayip majanger
– Pei teti jangra alibatem mejangra akümer
– Mapa nung temulung magütsüteter (poor concentration)
(b) Manic symptoms kar yamai alitsü :
– Kecha masü nung kanga pela alir
– Mapatem kanga teinyaknü (energetic)
– O kanga jembir.
– Mapa ajak nung over confident süa bilemer, jembir, inyaker
– Senotsü mebilemdangi endoker koba ajanga tamakok alutsü
meshidanger.
– Animesüngzükteti alir (restless)
– Akhi mapang dang nungi mapa tali inyaknütsü.
Item timtem ya tenzükdangbo shitak amai tenzüktsü. Treatment magira tesülenbo maparen ajak meyokteptsü aser ka danga junga meinyaktetsü. Pei sasa kanga ulua bilemtsü aser yamaji jembishinütsü aser alitsü merangtsü.
c) Bipolar Disorder:
Iba disorder ya Manic Depression taa ajar. Koba nung nisungbaji mood aiben melenshia alir. Mapang mapang nisungbaji agüja aliba depressive aser manic symptoms tem ya melentepa adoktsü. Mapang (depressive episode) ka nung nisungbaji jashia, mapa inyaktsü mejangrai alitsü. Ano mapang tatsü ka lir külen (hapta mesüra ita) nisungbaji manic episode-i melena mapatem kanga teinyaknü (energetic) alitsü, Senotsü mebilemdangi endoker koba ajanga tamakok alutsü meshidanger etc. koba ajanga nisung ka taküm nung timtem jenti adoker.
3. Psychotic Disorders:
Iba timtem ya mashi dak ataloktsü akok aser timbaka küm 15 tema mapang nungi tenzüker. Kodang iba amala timtem lidir nisungba jagi pa/la meküta alibatem yimya balaka melenshir (crazy/ strange) ama bilemtsü. Mapa nung temulung magütsüteter, peii teti jangra inyaka aliba mapa a sendoka yutsür. Oda lia lia shitakba taküm nungi pilaa aor (break from reality) aser mali sür nung angur, angashir etc. Iba psychotic disorder ya karbo teyari magiyonga ita ka ana nung jungadoker saka karbo taküm tepiyong mozü agia alitsüsa akümer. Psychotic disorders nung symptoms kar yamai lemsateper:
– O junga atongtepa mejembiteter (disorganized speech)
– Pei temang anepalutsü sendoker
– Mapa sendoka yutsür
– Yimya tasen balaka benshiba (strange behaviour)
4. Personality disorders:
Personality disorders nung ya nisung ka taküm nung pa/lai tebilemba (thought) aser yimyatem (behaviour) ajanga pa taküm nung timtem aser tetsükdaktsü (challenge) adokdaktsür. Iba timtem ajanga nisung kaji tangar den tesendaktep aser amalitep raksadoker, pei temulungjang nungi nungteta adokba tebilembatem (emotions) junga anepalu (handle) mesüteter, tetsübutsü/ tamajung yimyatem ( harmful behaviours) mepaidokteter koba ajanga pei taküm nung nükjidong ataloktsü makoker. Iba timtem ajanga nisung ka taküm nung timtem ajurudang itemji akoktsü (solve) mokoki akümer. Borderline personality ya iba ama disorder indang tatishitsü ka lir.
5. Childhood disorders:
Tokolok timtem ya tapu aika lir aser iba rongnung aika tila tanur asüdang nungi timtem adoker/tenzüker. Timtem karbo yakta meteter aser ano karbo tanur kaji ina atudang dang junga aser jangja meteta anepalutsü bushir. Item rongnung kar yamai lir:
– Attention Deficit Hyperactivity Disorder (ADHD)
– Autism
– Learning Disabilities
– Conduct Disorder
– Anxiety Disorders etc.
6. Somatoform disorders:
Iba timtem nung nisungba ji temang tenük telen balala nung timtem (complain) alitsü. Doctor aser mozüki balala nung treatment agia senzütsü saka tashitak kecha meputetsü. Temang telung nung tashitak kecha mali ta Doctor ajaki shiaka mamangtsü aser ano Doctor tanga bushia aotsü. Timtemer kajibo shitakba timtemji (complain) lir saka temang telung nungbo tashitak kecha mali. Treatment senzüdang mapang aser rongsen ajak indoker.
Nisung aikati bilemer iba tokolok tebilemtsü tashidak ya ajak dakbo matalokba timtem amai bilemer saka shitakba nung kodang reprangdangdir iba ya shingaia mejenbuba timtem ka lir. Anungji kodangsa kibong nung, lokti nung iba ama timtem aketer ya ajitetdir yakta anepalutsü nungdaker. Medemeri medemer anepalutsü akok, kibong nung kinungertemi anepalutsü akok, ano tajungtibaji doctor aser item amala anepalur telok kong lir item denji yakta metetpelatsüla. Asenok ajaki metetsü kaji iba tashidak ya tanga temang shirangba ama mozü telong ka ana achidang anüpba mesüra mapang tatsüka nung junga akümba ama meimlatsüla. Iba ya mapang agia pa/la tebilemtsü ajak angateta anüpaluba agi dang iba yabo akoker.
Iba amala teyari aginüra District Mental Health Program (DMHP) tasen ka Civil Hospital anasa Isolation Ward Mokokchung nung tenzüka lir. Nüngdakba pur asoshi mozü aser anepaluba ajak angati (free treatment & medication) angutsü. Ano tali angajemnüra DMHP office-i arua metetpelatsü metetdaktsür.