Tekoloki temepu den jembir (T.M. 13:1-13)

“Anungji shibai atem, mesüra shibai tzü ain, pa kecha masü, saka Tsüngremi indaktsü.”  (1 Kor. 3:7).
Tsüngrem mapa tejakleni aotsü Tsüngremi Pa taochi aser shisatsü Arogo nung madenba tentettem (para-churches) nung amshir. Saka pastor aser arogo lenir kar asoshi ibaji tenük komo ama lir. Iba tentet asoshi Laishibaren nungi teti tasüngdangba alir. Anatsülen nungi lemsatepba ajanga ibai tangatetep kati arutsü.
Tenyartem Mapa 13ji missionary society tenzükdak asütsü ta bilemer. Arogo tenzükba wadang tuluba küma aotsü asoshi Tanela Temeshi liyim arogo nungi Bernabas aser Paul aja. Parnok mezüngbuba missionary aini aoba sülen parnok Liyim Arogoi yokba arogo dang parnok osang agütsütsü asoshi arogoi meyipa aru (T.M. 14:26,27). Saka iba sülen Paul aser külem inyaker arogo ka dak sendakloka aliba asenoki mangur. Parnok mapa inyakba yimyaji missionary society inyakba mapayimji aküm.
Arogo nung madenba tentet tenzükbaji arogo nung maten. Arogo indang asenok tangatetba agi liyim telokji metsükdangtsüla. Tsüngrem yimli nung arogo tentet nung madenba arogo (para-church) indang alima rangben Arogo (Universal Church) mapa jagi rasaa angatetdaktsütsü akok. Sempet tang balala masü saka tenzükba balala aser mapa balala lir. Saka ajakji kasa Tanela, kasa Kibur aser kasa Tsüngrem ajanga lir (1 Kor. 12:4-6).
Mission nung missionji Arogo atemba aser Arogo missionji missiontemji lir. Pastor aser pa telok Laishiba akatsü asoshi Laishiba meyiper aser Bible Society tenüngdaktsü. Teyari agütsür teloki Arogoji yarir. Arogo mapa balala inyaktsü asoshi Theological College tem nung angazükdaktsür. Missionarytemi Arogoi melongjemi aliba nüburtem dangi tonga aor. Item teloktemji tetsüng ama lir. “Tekolaki tetsüng dang ni na menüngdaker” ta ashitsü makok (1 Kor. 12:20,21).
Arogo nung matenbatem teti ajak ajurutepdak sabang yanglur. Kodang asenoki teyari bushidir tajizükba aika inloktsü akok. Tenzükba balala ajanga Pa yimli nung tajangzük agütsüba asoshi asenoki Tsüngrem tenüng sangdi. Asenoki Mosa ama temulung ulua inyakdi (Züng. 11:26-29).
O Oba, Ne mapa asoshi kü mangdang aser kü mulung ulua kümdakjang. Amen.