TEKULEM LIROMEDEM

– Rev.Z.Yapang Aier
Aoyimti.

Takülem liromedem ya arogo ajak nung kanga nüngdaker. Arogo aika nung topur junga külemba angur, arogo kar nungbo yimya tera balaka nung külemer. Akok tashi asen arogotem (ABAM) yabo liromedemtsü nüngdak ta bilemer.
1.    Tenla saruba yimya balala :-
Arogo kar nung tenla asoshi sarasadem dang tesarurtemi lokti tsütsü tejak shia nokdaker sarasademer.
Ano arogo kar nung tesarurtemi pulpit tsütsü shia nokdaker sarasademer.
Tasembuba teloki tenla chikokji ketdangbuba nem agütsür,pei mendeni oa amener, parnok oaya alidang sanüker/tesarusangi tenla dak sentakba nüngdaktem shir sarasademer.
Tesübuba yimyajiang tajungba amai. Kechiyong arogo tulu nungbo nisung 10-20 tashi noktaker  ano sarasadem agia tasür aodangji mapang tera tali agir amato.
2.    Tsungrem sangang pai moatsür ken atenba :-
Ibai sarasadem ken (Doxology) iba ken tener ajaki Amen ta  ashir. Taibo mali, saka lokti aika nung ken aser sarasadem külemi agir.Kokra ana rongnungji ka dang retreta agi tajungba asütsü.
3.     Kibuba benjung achiba yimya:-
Ketdangbubai ketdangser nem anganüa agütsüdang amtsük aser auso temerük  asünung auso 5/6 külemi atongtepa bener oa agütsü nung junger ta bilemer. Auso aika süra anabena lemdanger agütsütsü. Saka pulpit nung aiben arazüa kaka kaka aiben belenbaji topur majung amai aser mapanga tali agir.
Ano marok kodang anganutsusa sudir, ibaibo marok ausoji langpang nungdang yua lia sarasademer ketdangbubai lemja lokti dangi yoktsu. Minute 10,20 agibo tekeraba nung mapa ajak abensa-a temer atatsu.
4.    Mokokmeiner tenla saru (Alms giving):-
Kibuba benjung chia jemer külen, tatem ken atendang, temulungertemi mokokmeiner atema langpangi arua tenlatsü ,mesüra pei arogo dak apetba yimya nung sarutsü.
Tenla kwi arudir ibaji sentep temer mesüra hopta  tsüngda nung  mokokmeiner atema tenzükertemi oa sarasadema agütsütsü.
Baptist manual nungbo ibai züluja lir. Arogo kari inyaka alitsüa akok, saka tanü asüng aikati mebenshir. Kokra mapang apir benshi nung junger.
5.    Mapang aginer lira:-
Mapang aginer lira ta asüba yimya ka amato aor.Telok nükentsübu agi asütsüa akok,mesüra kanga tongtibang asüba agi agütsür memetet. Mendeni mapang agütsür, shinga melira sentepji lapir amato. Anungji nisung kari salem O, Tsüngremer osang kar shinüra jilia sannüker/menden den jembia ashitsü akok.
Arogo timba ka nung deobar, bodbar aser honibar sentep ajak yimya kesa nung dang aor. Kokra, arogotemi honibar sentep ama yabo arogopur ajak tanela nung satok satoka ken atenba, koli sutepba, sarasadem onuk palala, salem osang yamala lemsateptsu. Mapang kaka tagir melira sannuker Tsungrem O  tsungir atemtsu.
6.    Ken anishiyim:-
Joko arogo aika nung music director, choir master mesüra, ken anishitsu nisung kar nem nunglokja lir. Pai/lai sentep matem tashi topur junga telok anitsüla. Lokti kar nung tejangra agi mesüra yimya memeteti mendenbubaia kenji anishir. Yimya agi teka ayipzüdangji ka tekaraba, ka meilongi ta aor, idangji loktibo ratar, koba sülenanga manidaker ? Anungji nisung kati dang jungjunga anishi tajungba asütsü.
7.    Ao ken kaket:-
Joko arogo aika Tsüngremi moaja, senpong melema kümogo, anungji tekülem nung amshitsüsa arogo senpong nungi ken kaket alia ayu nung ajungtsü ta bilemer. Kiyong talang nungi tetsüng agi arurtem asoshi teyari tulu asütsü.
8.    Tatem sarasadem ken:-
ABAM kubok liromedema atentsu asoshi ken kaket tatembanglenji sarasadem ken züluokja lir. Talisa deobar tekülem sentep atemdang aikati liromedema atener. Saka ano arogo kar nungbo matener. Kokra arogo ajak nung liromedema aten junger.
Tatem nung, metokmeperi kar lira metongshia agitsu mepisher.