Tekümdangtsü mapang

Delhi nung oagi Nagaland chief minister, T.R.Zeliangi anir Nagaland yimsüsürtemi ato kilonser Narendra Modi ajurua pa dang Naga yimten tebilemtsü ken o tekaratiba nung latettsüsa inyaktsünüba aser NSCN-K telok o center sorkar na tsüngda yimjung nung alitsüsa inyakdaktsüner ta mepishiba kasa anogo nung aruagi, Nagaland nung Meluri sub-division kübok Assam Riles sepaitemi NSCN-K pur ana den tai maketba tanur ana khasetba mapaji state sorkar mezüngmeshia inyakba mapa ka lir. Taoba hopta iba osangkaket yimobilem nung Armed Forces (Special Power) Act amshia center sorkari Nagaland “disturbed area” kümtsüba tebilemtsü indang lemsatepba nung ashiba ama, tang ya Nagaland ya ‘Central Rule’ nung lir, kechiyong state sorkari memetet center sorkari Nagaland disturbed area kümtsü. Aji oda, central rule nung nung alir asünungji, Nagaland sorkar aser Nagaland police-temi repranga lia army aser Assam Rifles sepaitemi dang tashi amshia tai maketba nisungtem dena khaseta endoktsü tenzükogo. Yimjung nung mali asünungji NSCN-K telok o India sepaitem nabo teti khateptsüa akok saka parnok khatep dang tai maket nisung asütsüsa injang yokba mapatemji shisabolutsüka lir. Naga nunger telong nung alirtem o India nunger sepaitem na khatepba mapang tai maket nisung khasetbaji tang mezüng masü aiben ataloker. Ajisüaka, tai maketba nisung khasetertem pua merenshibabo kodanga mangashir. Ibaji Nagaland ya ‘disturbed area’ asüba agi asütsüa akok. AFSPA ozüng kübok kodang tesem ka disturbed area kümdaktsüdir, joko iba tesem nungjibo state sorkar temelaba magii India nunger sepaitemi nisung mashi ka dak temulung melemtetba kuli kija agi khasettsüa akok. Ajisüaka, ano aji tatem masü, disturbed area nung sepaitemi nisung khasetba ken o ji okadak kecha nunga benoktsü makok. Ibayongji, tan Meluri len Assam Rifles purtemi tanur ana kasetba maparen nungjia nisung khasetsangjibo maputsü aser pa anema okadak ken o kecha mebenoktsüa akok. Temulung malemba kija agi tai maketertem khasettsü melaba ozüngjibo kangasa tamajung lir. Iba ozüng yabo Nagaland nung dang masü saka alima nung mamshitsüla. Aji oda, state sorkar taküm nokdaka lia India nunger sepaitemi pei inyaknütsü inyaktsü aser ibaji anema shingaia ola adoktsü makok ta asüba ozüng kübok Nagaland nung alir nübortem alitsüba yabo state sorkar asoshia mezüngmeshi mapa tulu asütsü. Atangji, Naga yimten nüjiso bushir  Naga nunger telok balala lemsar India nung dang masü saka Myanmar tashi nung alir asünungji India asoshia shisabolutsüka lir. Ajisüaka, India sorkari Nagaland disturbed area ozüng kübok yutsüba agi ano taliang disturb asütsüsa kümra, India sorkari ano khen bilemdangtsüsa Naga nungertemi maneni jembitsüla. Naga yimten tebilemtsü onük jembiba ya sepai tashi agi anendaktsütettsüka asübo anener lila, mesüra AFSPA ozüng ama tesashi agi Naga nunger mulung akoktsü asübo koker lila. Ibaji ato kilonser Narendra Modii angatet asübo, AFSPA ozüng masü saka Naga nungertem den yimten ken o timi süoka jembitsü merangla. Atangji, alima nung tajung aser shitak inyaktsü kodanga temenu maka aser makoktsüba tebilemtsübo alima nung mali. Anungji, Naga nunger yimsüsürtemi maneni India nung lenirtem nem Naga nunger tebilemtsü aser taginüba angatetdaktsütsüla. Naga yimten melatettet tashibo Naga nunger asoshi dang masü saka India sorkar asoshi tebilemtsü tulu asütsü. Aji oda , tang ama Naga yimten tebilemtsü koka meinyaktetba agi Nagaland “Disturbed Area” kümtsüba jagi tebilemtsüang tali adoktsü. Iba ama mapang nung nübortem kanga kümdangtsüsa adoker. Aji oda, Nagaland “disturbed area” nung ali tashi India-a disurbed area nung alitsü, anungji disturbed area nung aliba agi shinga kecha majangzüktsü.