Tekümdangtsü Terenlok Mapa

Tanü asen lima nung asenoki kanga aginüa nüngdakbaji terenlok mapa ya lir. Tangar menepa merenloktetaka tangbo asenoki tajung aser majung meteta akümnungji asenoka tangar ama renloka linüba tejangraba lir. Aji oda, tangar ama renloknür saka merenloktetter ta asüba tia nung tang asenok bangdaka lir. Iba ama tia ka nung terenlok tenüng nung asenok yimten aser lokti tangatetba dang masü saka tamangba yimsü dena melentsüsa mapang ajurutsü ana nung lir. Asenok dang masü alima tesem aika nung terenlok nüngdakba purtem aika lir aser item tesemtem aika nung asenok Khristan-temi tonga oagi temeim agi pei rongsen endoka terenlok mapa inyaktsür. Item ama merenlokteti aliba tesemtem nung asenoki school lapoktsüba, mozü ki yanglutsüba aser maparen tapu balala nung temeim sayua yaritepba agi parnok aika taküm nung Yisu Khrista-ji pei kibur aser kümtetdakba ta agizüka temulung meyiper aser arogo akümer. Ibaji mesüaka tanü asen lima nung asenoka renlokner saka merenloktetter ta aliba mapang ka asenok dangi terenlok mapatem temeim agi angati inyaktsütsü purtem tangar aika arur. Parnok karibo tang Assam nung Ramdev-i Ashram lapoknüba amaji Nagaland nunga lapoknütsüa akok. Item amaji mesüka kari kaketreju tajung lapoktsünütsüa akok aser karibo mozü ki tulu yanglutsünütsüa akok . Item ajakji asenok asoshi kanga nüngdakba terenlok mapatem asütsü. Ajisüaka, asenoki item terenlok mapatemji shibai aser shirnoki inyaktsür, parnokji kechi komala nisung, parnoki tanga tamangba yimsü sayur asü ta asüba mapatem indang kanga junga bushisüngdangmatsüla. Asenok ajaki India nung Yoga sayur Ramdev meteta lir. Pa ya Yoga sayur ka dang masü saka par yimsü nung kanga keta asenba lenir la lir. Pai chiyongtsü aser mozü tapu aika yanglua ayoker, anungji  pa ya India nunger takartem rongnunga takatiba purtem rongnung adentsü. Aji oda, pa ama India nung tamangba yimsü nung lenirtem aika takar lir. Asenoki dang yokdi asünungbo Nagaland ajunga ya parnoki alitettsü. Iba ama takar aser tesayurtemi tanü sorkari meinyaktetba terenlok mapatem inyaktsür. Ajisüaka, Assam nungbo ULFA (I) teloki Ramdev-i ashram lapoknübaji tanga nükjidong masü saka Assam nung RSS aser parnok indang Hindutva tesayuba dera yangdaktsütsü asoshi lir ta aija metetdaktsüogo. Iba nungji asenoka tebilemdangtsü tuluka lir, kechiyong asen lima nunga iba ama terenlok mapatem inyaktsü asoshi tanga tamangba yimsü lenirtemi merangba angur. India nung tang ya Khristan-tem Hindu nunger akümba mapang lir, anungji asenoka asenoksasa kanga kümdanga mita matara asenoki memeteti terenlok mapa inyakba tenüng nung limapur küma aotsü. Khen limapur kümerbo joko idak nung jagi temulung meyipa Khristan akümtsübo tasak asütsü, kechiyong limapur kümerang jangratatemba alitsü. Aji oda, sentepi mouka, sarasadem mesüaka, Laishiba mezüngaka aser tzü nung metsüsenaka Khristan pur ta ajaba purtem dangbo tuluba aser teimba mapa tajung inyaker asünungji, tamangba yimsüji tanga kecha masü saka “temeim” lir ta asüba tangatetba nung tenla kidangi oa külemba yimsü amadoktsü. Iba ama shitak mesük saka tai ta asüba tesayuba aser terenlok mapatem nungi asenok tamanger shia jenbua alitsü kanga tongtibang kümogo. Atangji, iba ama tereprangtsübo terenlok saka shitakbabo tanga tesayuba ta aruba tatidangtem nungi tamangertem metsükdaktsüi jenbua alitsü asoshi arogo shia nung tesayurtemi lai tesayuba shitak agütsütsü kanga nüngdaka kümogo. Joko, kechi shitak aji ajangajanga jungjunga sayutsü saka kechi meshitak ajibo kanga sashia nokdangtsü ta asüba mapang ka agi asenok menepogo. Iba ama shitakba tesayubaji asenok dak tangatetba melira mesayutettsü aser manidaktettsü. Idangji, asenok Tsüngrem sülen masü terenlok mapatem sülen talangka orr alitsü. Iba ama mapang ka nung bilemtettsü asoshi, Yisuia Satan dang nisungi amtsük kisüng agibo taküm melitet ta ashi südi ta bilemtetdi.