Tekümtet

Lendong nungi, talenba nungi, tashidak nungi, mesüra temenen nungi kümzüktsü inyakyim dang tekümtet ta ajar. Laishiba tekümtetji temang lendong mesüra teimla makai aliba tia nungi kümzükbaji tekümtet ta amshi. Obendanger ainkar putir, mesüra shibai kümzüker pa dangji “Kümtetdakba” ta ajatsü akok. Tesülen Tejen aser Tasen Lai anaprongla nung shi temang aser tanelaren kümzükba indang tali amshia zülu, Alima ajunga nung meimchir tekümtetji nüngdaker saka peisasa aji meinyaktetter. Pa samaa aliba jenjangji tapu balala ashitsü akok, teraksa, tashidak, tasüba, Tsüngrem sentsüwangshi matongba, shibanga lir ta bilemba – kija aser ni kodanga meyangluba lima nung tsübur, temenen talenba aser iba nungi adokba, medemer aser Tsüngrem nungi pilaba, Tsüngrem anemba, aibilen, shisabulu aser yamala. Tangar teyari meteni peisasa tekolok shisatsü, rongsen, yimten tashi, lokti mesüra nisung mulung nung aliba putetba tasa agi item tebilemtsütem akoktsü merangba amajok ta kuli angu. Mosa ozüngi tekümtet magütsütetaka, nisungtem dang temenen angatetdaktsüba aser Tsüngrem taochi meleni tekümtet angutsü tamakoktsü ta teperi tangatetba agütsü.
Tsüngrem taochi tematiba nung jungkai adoktsüba, tekümtet otsü nung ranglokdakji Khrista kangkiji lir. Tasen Lai nung iba mapa iba temaitsü lateta sayuba O balala amshia sayu. Alangzükba, ibai alar alangzükba indang jembir asütsü akok mesüra Kibuba obendangdak temeten aser tasüba madak takok anguba indang jembir asütsü akok, ajak nungji tekümtet tashiji nisung meyong masü, Kibuba meyong lir. Tekümtetji Tsüngrem angati sempet sama alir aser malangba nisung shirnoki Khrista temeshiba nung amanger aser ajemalua Pai mulungba bendanga agütsür nem agütsür.
Asenoki tekümtet asemsü lemdangtsü akok, tesüiba, tang aser tarutsü. Tanaben asori tekümtetji angur. Pai tesüiba nung menaba tatok agütsür aser amatoker. Pa tasü nungi takümdaki aor aser Tsüngrem tsüngdang techir ka temeten ngua noktaker. Pa mulungjang nung Tanela Temeshi süngjangi tamaitsü ajener aser teti maka takümji tang akar, tasüba tetsübu nungi nüji akümer.
Iba nung bendenloka Pa tekümtet asoshi inyaktsü tenüngdaktsü (Fil. 2:12). Pa tajaba jangjatsüla (2 Peter 1:10) memeshiba aser alima tejangraba intoktsüla (Tit. 2:12) aser telunglen melenshiba tema nung sayua temeshiba mapa inyaktsüla (Yakob 2:14-26). Tatemsa, tekümtetji tarutsü asoshi lir ta züngshir aser ibaji tabensa tekümtet lir koba asoshi asenoki yimlar aser tang tesadang nung pelar. Kodang Khrista tanaben arua Pa meyongtem anitendir aser tamajungba tashi ajak raksatsür kotak tasen aser alima tasen yangludir ibaji tabensa tekümtetji asütsü.
(Temenen pungiba, shimtet, metendaktsü, meshitettsü, tekümtet melen amshiba O tem lir)
Oba, Ne tekümtet mapa nung ni teti amanga teyimla nung pelaa alitsü kü dang aochiang. Amen.