Tekümtet asoshi inyakba

Alima nung alir nisung shia atema tanüla tekümtet ya kanga tongtibang lir. Tekümtet tetezü kümzükba. Ajisüaka, tekümtet anguba ya ken atema mesüra kenü langka ka inyaker toktsütsüba masü saka tekümtet yabo maneni inyakyonga aotsüba mapa ka lir. Atangji, tekümtet anguba ya asenok ajungba agi mesüra asenok dak alangba agi masü saka Tsüngrem taochi ajanga anguba mapa ka lir. Aji oda, Laishibai ashir, Tsüngremi asenok kümzükba ya mesüra tekümtet anguba ya asenoki inyakba agi masü saka aji Tsüngrem sempet. (Efesa 2:8). Tetezü asenok sasa asenok kümzüktsüsa asenok dak tashi mali, saka Tsüngrem taochi agi asenok nem tekümtet ya sempet ka amato agütsü. Aji oda, tekümtet ya Tsüngremer angati sempet lir. Ibai Tesüngmangtsü. Sempet tetezü sen agi aliba masü, asenoki aazükba masü saka angati anguba temoatsü. Ajisüaka, iba sempet ya odang amer kazütsüba sempet ka masü saka sempet denji mapa inyaktsü dena agütsür. Asenok kümzükba mesüra asenok nem tekümtet sempet agütsübaji ajanga Tsüngremi asenok dang akhidang menaba temenen madak dang masü saka ano tarutsü mapang menatsü aliba temenentem madaka takok agütsür. Tetezü, tekümtet sempet ya raraba nok nü ang ka mesük, iba yagi temenen den raratsü. Iba jagi ashir, tekümtet ya kenü atema dangbo masü saka alima nungi mepila tashi inyaktsüba mapa ka lir. Kodang asenok nem Tsüngrem tekümtet agütsür, asenokji tangang tasen poktetba taküm ka ama akümer (2 Kor 5:17). Tekümtet mapaji yang nung jagi tenzüker. Aji oda, kodang asenok taküm ya tasen poktetli ama akümer, iba anogo nung jagi Tsüngrem den jaja tenzükdang anogo shia asen taküm tasenba-tasenba yanglulokyonga aotsü Tsüngremi imlar. Kodang asenok nem Tsüngremi tekümtet sempet agütsür, idangji asenok pelar aser iba tepelaji mesamadaktsüi tanüla temeshi agi asenok sünga alitsü Tsüngremi imlar. Kodang asenok Tsüngrem nungi tekümtet angur, asen takümji Tsüngrem meyong akümer, anungji asenok taküm ya asen mulungba nung masü saka Tsüngremer mulungba nung aotsü. Laishibai ashir, Tsüngremi asenok nem Pa temulung chia inyaktsüsa mulungtetdaktsütsü aser inyakdaktsütsü asoshi asen mulung nung inyaker. Ibai asenok atema teshisadangtsü aser teinyaktsü mapa tuluka lir. Tsüngrem atema inyaktsübajia Tsüngremi dang asen mulung nung mulungtetdaktsür aser inyakdaktsür. Aji oda, Khristan taküm kati angateta inyaktsüba mapa kaji asenoki anogo shia Tsüngremi asenok dak temulung lemtettsüsa kanga kümdanga inyaktsüla. Ajisüaka, ano külen Tsüngremi dang asenok nem Pai mulungba inyaktsü mulungtetdaktsür aser inyakdaktsür ta bilema Laishibai ashi ama kechi inyakdir, “kangkokangji mesüra tashishiba kecha medeni inyaktsüla.” Filipi 2:14. Itemji Tsüngremi agütsüba tekümtet mapatemji lir. Kodang Tsüngremi asenok taküm nung inyakba metetdir, asenoki Pa den külemi Pai mulungtetdaktsüba aser inyakdaktsünübaji angateta inyakra, iba jagi asenok dak tekümtet alibaji ano tali tejangjaba meteta inyaktsü.