Telangana: Gari lendong nung nisung 16 asü

Hyderabad, May 15 (Agencies): Honibar aonung tesü Telangana, Adilabad district nung truck kati auto-rickshaw ka dak tsükoktsüba lendong nung nisung 16 tashi asü aser nisung asem yiruogo.
Asürtem rongnung tanur tenet liasü aser kibong ka nungi züngsem ti tashi liasü.
Truck jagi auto dak tsükokja auto ji rembang, aser idakjisa nisung 13 atanga asü.
Iba lendongji Bhainsa Mandal district kübok Bagam yim nung ataloka nisung 13 asü aser nisung asem mozü kidangi anir aodang lenmang tom nung asü.
Tang yirua alir nisung asem Nizamabad Hospital nung yaridar.
Asürtem aser yirua alirtemji Maharashtra nung Bakar Mandal aser Nanded district na nungi aayangertem lir, aser parnok Adilabad nung aliba Pochamma tekülem kidangi aodang iba lendong atalok.
Iba osang angshia Telangana Chief Minister, K. Chandrashekhar Rao-i takoksa ajurur kibongtem den asüko osang lemsatepba den külemi ketdangsertem dang yirua alirtem tajungtiba agi yaritsü tuyuogo.