Telangana nung Assembly anenogo; assembly election tekaraba agitsüa akok

New Delhi, Rongjui/September (Agencies): Tanü nikongdang Telangana Chief Minister, K Chandrashekar Rao leniba nung Cabinet senden ka amendang Assembly anentsü atema telemtetba ka agi.
Iba senden tembangba sülen Chief Minister, Rao Raj Bhavan-i oa state Angh, ESL Narasimhan nem shidi agütsü, aser Angh-i Cabinet telemtetbaji agizük.
Raj Bhavan sangdong ka ajanga, “Chief Minister aser Council of Ministers-i benokba shidi agutsüdang Angh-i K Chandrashekar Rao aser Council of Ministers dang sorkar caretaker ama maneni office bena atatsü asüngdang. Yamaji Rao-i pai mepishibaji agizük,” ta metetdaktsü.
Ibaji ajanga Telangana nung mezüngbuba Legislative Assembly anenner.
Rao leniba nung Council of Ministers-i 2014 küm Aami/June 2 nü tenangzükba agia liasü, aser iba anogo nungji India nung state 29buba akum.
Tang assembly anener, anungji state nung election kera agitsü-magitsüji Election Commission dak keta lir.
TRS sorkari election kera agitsü atema telemtetba agibaji Congress aser opposition party kari aitsüogo.
Telangana unit Congress tongti otongdar, Sravan Dasoju-i, “Timtem aika ajangshia dang state tentet. Nüburtemi terenlok imla, aluyimertem tebilemtsü aser mapa adokdaktsütsü ta imlaa liasü, ajisüaka item tenangzükba ajak tamakok angu,” ta aitsü.
Paisa, Ato kilonser, Narendra Modi aser Rao na tsüngda telung nung tezüngzüktep ka lir- Lok Sabha aser state assembly election na külemi agira ibaji “Rahul Gandhi aser Modi na tsüngda tongbang ka asütsü, aser Telangana ama state nung Congress tajangzük angutsü, ibayongji election külemi magitsü atema parnoki iba telemtetba ya agi, ta aitsü.