Telangana nung election campaign tenzüker

Hyderabad, Rongjui/September 08 (Agencies): Telangana assembly anenba sülen anogo ka dang lir TRS Tir aser caretaker chief minister, K Chandrasekhar Rao-i taruba election atema party campaign tenzüka, Congress Party-i küm 50 tashi junga yimsü masü, ta aitsüogo.
Ano külen state Congress Party-ia TRS sorkar atsüngdoktsü atema TDP densema opposition party tem ka küma lokteptsü atema tayongzükba den külemi lokti tentettemia nungittsü mepishi.
Yashi Rao-i menden 119 aliba assembly nungi menden 105 atema candidate tem tenüng sangdongogo. Husnabad, Siddipet district nung election senden nung pai Congress-i Andhra Pradesh state melemsai aliba mapang nung Telangana nüburtem kanga timtemdaktsüogo, ta ashi.
“Congress-i küm 50 tashi iba linük yimsü süogo, ajisüaka parnoki ochimeshii yimsüsüba ajanga Husnabad aser Telangana na dang masü saka linük tesem ajak sensak tiai yok,” ta pai aitsü.
Telangana Pradesh Congress Committee Tir, N UttamKumar Reddy-i, taruba election nung TRS den toktepbaji ochi tongbang ka asütsü, ta ashi.
Party tem den lokteptsü atema tang party telung sasep nung o lemtep tenzükogo, ta paisa metetdaktsü.
TDP Tir aser Andhra Pradesh Chief Minister, N Chandrababu Naidu-a TDP Telangana unit senden nung tongti tejaoker ama dena liasü; taruba election nung Naidu-i party lenirtem nem shisa agutsütsü imlar.
Tanü Delhi nung BJP’s national executive senden nunga Telangana assembly election atema asalentong yangluogo, ta osang angazüker.