Telangana nung ita shia sen crore 1,500 takoksa angur

Hyderabad, November 26 (Agencies): Centre sorkari sen tamshidak anentsütsü telemtetba agiba ajanga Telangana sorkari saru nung ita shia sen crore 1,000 nungi crore 1,500 takoksa anguba asadangtetogo, ta tanü state Finance Minister, Etela Rajender-i metetdaktsü.
“Ita shia sen crore 1,000 nungi crore 1,500 takoksa anguba onoki asadangteter. Iba (saru nung takoksa) ya ano ita kwi alitsüar onoki mejangjar. Sen ishika indang notes maru tashi timtem alitsü. Ibaji ita asem mesüra ita trok asütsüa akok. Ibaji Centre sorkar dak dang keta lir,” ta Minister-i osangbenertem dang ashi.
Osang ajanga ashiba agi, Centre telemtetba ajanga stamps, registration, motor vehicle aser commercial saru nung mejungi kongshiogo.
Tawa Chief Minister, K Chandrasekhar Rao-i Ato kilonser, Narendra Modi ajurua pa dang sen tamshidak anentsüba ajanga state senpong nung kongshiba indang lemsatepa liasü.
Ano külen TRS lenir kati, Centre sorkar telemtetba anema Hombarnü Opposition party temi linük tesem ajaklen longkak aittsü aliba sentong nung par party bo madentsü, ta metetdaktsüogo.
“Black money nokdangtsü atema Ato kilonser Narendra Modi nükjidongji onoki pelaa agizüker, saka iba mapatong benoktsü atema ozüngtem nung temelenshi nüngdaker,” ta party lenir jagisa ashi.