Telangana nung morok keyi kati nisung trok yirutsü

Hyderabad, December 01 (Agencies): Mongulbarnü Medak district, Telangana nung morok keyi kati tajemba agi nisung trok yirutsüogo, ta police-i ashi.

Iba lendong ya Medak district kübok Chukkapur yimtak atalok.Parnok yirur alirtem rongnung kabo tasü taküm tsüngda kangshidar, ta sangdong ka ajanga ashi.

Mongulbar anepdang alu nung mapa inyaka lia aluyimertemi iba morok keyi angu aser kanga aoksa-a pusatepa ajenba mapang par trok ya yirutsü.

Forest official temi police aser yimtsüng nung aliba nüburtem teyari dena iba morok keyi aputsü merangdang, ajisüaka mepushi. Anungji iba sülen parnoki sang yuja iba keyiji pua Hyderabad nung aliba Nehru Zoological Park-i bener ao.

Iba morok keyi ya gondha pongu nung pua arutet.

Teyirur par trok prongla Medak nung aliba mozü kidangi anir oa yaridar aser parnok rongnung tetsür ka kanga mejungi lir, ta osang ka ajanga ashi.