Telangana nung nisung 500,000 sarasadem dak aden

Secunderabad, Tsüklai 02 (Agencies): Parade Ground, Secunderabad nung Telangana state aser linük atema sarasademtsütsü asoshi Evangelist Anne Graham Lotz-i ayongba sentong nung nisung 5,00,000 jungnüa arua aden.
Christian Council of Telangana ajanga anabenbuba ayongzükba “National Day of Prayer” ya US nung aliba evangelist Billy Graham’er (William Franklin Graham Jr) jala Lotz-i ketdang süa agi.
Iba sentong nung Lotz-i sarasadem ya kanga tongtibang lir, ta jangjatsü. Sarasadem ajanga nisung aser Tsüngrem tsüngta tesendaktep lidaktsür, ta lai-sa ashi.
Tsüngrem dak amanger nisung meyerijang aika iba sentong nung adentsü asoshi train, bus aser senzüsempongba lenmang balala ajanga linük tesem balala nungi aru.
Aenjeti 5 nung iba sentong nung adener ya nisung 500,000 jungnüa liasü, ta police temi ashi.
“Anne-i sayutsüngir Daniel indang jembi. Lai Daniel tekong 9 nungi jembi, kong nisung ka, shibai Tsüngrem metet aser sarasadema kotak arakzüdaktsü aser kin ka melenshidaktsü.’ Iba sülen lai sentong nung alirtem dang Daniel ama sarasademtsü ayongzük,” ta Lotz den jajar AnGeL Ministries Board nung züngsem, Vicky Bentley-i ashi.
“Tenük agi mongujemi oagi nisungtemi kotaklen shir ajep, aser Anne-i aniba nung mulunga kija aser linük nung revival atema jepa sarasadem,” ta pai shisem.
Iba sentong nung Roman Catholic Church, Church of South India aser Methodist arogo balala nungi Bishop aser ketdangsertem arua shilem tajung agi.